𝐅𝐢𝐟𝐢𝐝𝐢𝐚𝐧𝐚𝐧𝐚 𝐕𝐌𝐓 𝐓𝐨𝐚𝐦𝐚𝐬𝐢𝐧𝐚 – 𝐂𝐥𝐚𝐮𝐝𝐢𝐚 𝐓𝐒𝐈𝐓𝐎𝐋𝐎𝐌𝐘 𝐋𝐚𝐧𝐲 𝐈𝐧𝐝𝐫𝐚𝐲 𝐡𝐨 𝐅𝐢𝐥𝐨𝐡𝐚

Toamasina – Tontosa ny Alarobia 04 Jona 2025 ny fifidianana ho filohan’ny Vehivavy Mpanao Gazety eto Toamasina (VMT). Ramatoa Claudia TSITOLOMY, izay efa nitana io andraikitra io teo aloha, no voafidy indray hitondra ny fikambanana nandritra ny fe-potoana vaovao haharitra telo taona. Nahazo vato 14 tamin’ireo 21 narotsaka izy, porofo mazava fa mbola velona ny fitokisan’ny mpikambana aminy.

Mpanao gazety sady fanta-daza amin’ny fahaiza-mitarika sy ny finiavana amin’ny asany i Ramatoa Claudia TSITOLOMY. Miasa ao amin’ny Televiziona SISEL izy ankehitriny, ary anisan’ireo mpanao gazety mpisehatra mavitrika eo anivon’ny Feon’ny Demokrasia. Izy no misolo tena ity sehatra ity aty amin’ny faritra Atsinanana, izay anisan’ny faritra manana ny lanjany manokana eo amin’ny fanabeazam-bahoaka sy ny fanamafisana ny demokrasia amin’ny alalan’ny asa fanaovan-gazety.

Nandritra ny fitantanana nataony teo aloha, dia efa hita taratra ny ezaka lehibe nataony tamin’ny fampiroboroboana ny maha-matihanina ny vehivavy mpanao gazety sy ny fanamafisana ny firaisankina eo amin’ny mpikambana. Tanjona napetrany amin’ity fe-potoana vaovao ity ny fanohizana sy fanamafisana ny fanofanana, ny fiarovana ny zon’ny vehivavy mpanao gazety, ary ny fametrahana sehatra iaraha-misalahy amin’ny fampandrosoana ny asa fanaovan-gazety eto an-toerana.

Miarahaba sy mirary soa azy amin’ny asa miandry indray ny fianakaviamben’ny VMT, ary manantena fandrosoana sy firaisankina bebe kokoa eo amin’ny sehatry ny asa fanaovan-gazety eto amin’ny Faritra Atsinanana.

𝑵𝙖𝒏𝙜𝒐𝙣𝒊𝙣’𝙣𝒚 𝑬𝙠𝒊𝙥𝒂𝙣’𝙣𝒚 𝑭𝙚𝒐𝙣𝒚𝙙𝒆𝙢𝒐𝙠𝒓𝙖𝒔𝙞𝒂