𝐅𝐚𝐧𝐞𝐧𝐝𝐫𝐞𝐧𝐚 𝐏𝐫𝐚𝐢𝐦𝐢𝐧𝐢𝐬𝐢𝐭𝐫𝐚 𝐯𝐚𝐨𝐯𝐚𝐨 : 𝐌𝐚𝐧𝐞𝐡𝐨 𝐟𝐚𝐧𝐤𝐚𝐬𝐢𝐭𝐫𝐚𝐡𝐚𝐧𝐚 𝐬𝐲 𝐟𝐚𝐧𝐨𝐡𝐚𝐧𝐚𝐧𝐚 𝐧𝐲 𝐂𝐞𝐫𝐜𝐥𝐞 𝐝𝐞 𝐑𝐞́𝐟𝐥𝐞𝐱𝐢𝐨𝐧 𝐝𝐞𝐬 𝐄𝐥𝐢𝐭𝐞𝐬 𝐙𝐚𝐧𝐚𝐤’𝐢 𝐅𝐢𝐚𝐧𝐚𝐫𝐚𝐧𝐭𝐬𝐨𝐚

Namoaka fanambarana ny Cercle de Réflexion des Elites Zanak’i Fianarantsoa, izay nanehoany fankasitrahana ny fanapahan-kevitry ny Fanjakana Foibe tarihin’i Kolonely Michael Randrianirina, miaraka amin’ireo Mpanolontsaina Avo eo anivon’ny rafitra miandraikitra ny Fanavaozana ny Repoblikan’i Madagasikara, tamin’ny fanendrena ny Praiminisitra lehiben’ny Governemanta vaovao.

Ao anatin’izany fanambarana izany dia niarahaba sy nirary soa an’i Praiminisitra Mamintiana Rajaonarison ihany koa izy ireo, amin’ny fandraisany ny andraikitra ambony eo amin’ny fitantanana ny Governemanta. Araka ny nambaran’ity vondrona ity, dia antenaina hahavita tsara ny adidy iantsorany ny Praiminisitra vaovao, ka hitondra vahaolana sy fandrosoana ho an’ny firenena.

Notsiahivin’ny Cercle de Réflexion des Elites Zanak’i Fianarantsoa koa ny asa vitan’ireo minisitra teratany avy ao Fianarantsoa, nandritra ny fitantanan’izy ireo ireo ministera notantaniny tsirairay avy. Noho izany, dia naneho fisaorana sy fanohanana izy ireo mba hanohizan’ireo tompon’andraikitra ireo ny andraikitra efa nosahaniny teo aloha.

Eo am-pamaranana ny fanambarana, dia nanamafy ny fankatoavana sy fankaherezany ireo tompon’andraikitra dimy mirahalahy ny vondrona, ary nanantena fa hitondra fiaraha-miasa sy firaisankina amin’ny fanatanterahana ny adidy masina hiadiana ho an’ny tombontsoan’ny vahoaka Malagasy sy ny ho avin’ny Nosin-drazana.

Nofaranana tamin’ny hafatra manamafy ny maha-izy azy ireo ny fanambarana, manao hoe :

« Zanak’i Fianarantsoa tsa mandà fagnina ».