Notanterahina androany sabotsy 20 jona 2026, teto Mananjary, ny fanaovam-beloma farany an’i RAZAFINDRATSIDY Laurencin Vanceslas, mpanao gazety, izay nodimandry teo amin’ny faha-32 taonany, taorian’ny aretina nahazo azy nandritra ny andro vitsivitsy.
Tonga nanotrona sy naneho fiaraha-miory tamin’ny fianakaviany ireo namana, havana, mpiara-miasa, ary solontenan’ireo fikambanan’ny mpanao gazety. Maro ihany koa ireo olom-pantatra sy mpiara-monina no tonga nanome voninahitra farany azy, noho izy anisan’ireo olona nanana fifandraisana akaiky tamin’ny fiarahamonina.
Araka ny nambaran’ireo mpiara-miasa taminy, olona nanana fanoloran-tena tamin’ny asa fanaovan-gazety i Laurencin Vanceslas. Niezaka hatrany izy nampita vaovao sy nanatanteraka ny adidiny amin’ny maha mpanao gazety azy, ka nahazoana fankasitrahana teo amin’ireo niara-niasa sy nifandray taminy.
Fahabangana lehibe ho an’ny tontolon’ny asa fanaovan-gazety eto Mananjary sy ho an’ny fianakaviany ny fahalasanany. Namela vady sy havana ary namana maro malahelo izy.
Handry am-piadanana anie ianao, ry zandry.
Nangonin’i Océane Elia
FDM Mananjary
