𝐁𝐮𝐫𝐤𝐢𝐧𝐚 𝐅𝐚𝐬𝐨 : 𝐍𝐨𝐬𝐚𝐳𝐢𝐧’𝐧𝐲 𝐂𝐒𝐂 𝐡𝐚𝐧𝐝𝐨𝐚 𝟓𝟎 𝐭𝐚𝐩𝐢𝐭𝐫𝐢𝐬𝐚 𝐅𝐂𝐅𝐀 𝐧𝐲 𝐂𝐚𝐧𝐚𝐥+ 𝐈𝐧𝐭𝐞𝐫𝐧𝐚𝐭𝐢𝐨𝐧𝐚𝐥

Nosazin’ny Filankevitra Ambony misahana ny Serasera, na CSC, handoa lamandy mitentina 50 tapitrisa FCFA ny Canal+ International, noho ny tsy fanarahana ny adidy voalazan’ny fifanarahana mikasika ny fahafahan’ny mpanjifa mijery ireo fantsona nasionalim-panjakana ao Burkina Faso.

Araka ny fanazavan’ny CSC, tsy nohajain’ny Canal+ International ny fanoloran-tenany amin’ny fandefasana maimaim-poana sy tsy misy fepetra ireo fantson’ny Radiodiffusion Télévision du Burkina (RTB) ho an’ireo mpanjifa monina ao Burkina Faso. Voalazan’ny fifanarahana nosoniavina tamin’ny 14 Febroary 2025 fa tokony ho azon’ny mpanjifa jerena hatrany ireo fantsona ireo, na dia efa tapitra aza ny abônemàny, ary tsy mila manao dingana fanampiny izy ireo.

Na dia efa nomena fe-potoana hanaovana fanitsiana ara-teknika aza ny Canal+ International, ary efa nandefasana fampitandremana ofisialy tamin’ny Aprily 2025, dia nilaza ny CSC fa mbola nitohy ihany ny olana. Anisan’izany ny fitakiana amin’ny mpampiasa handefa SMS vao afaka miditra maimaim-poana amin’ireo fantsona voakasika, izay heverin’ny CSC fa fanitsakitsahana ny fifanarahana.

Manana 30 andro handoavana ny lamandy any amin’ny Tahirim-bolan’ny CSC ny Canal+ International, ary 30 andro hafa hanalana ireo sakana rehetra amin’ny fijerena maimaim-poana ireo fantson’ny RTB. Nampitandrina ny CSC fa raha tsy tanteraka ao anatin’ny fe-potoana voatondro izany, dia mety hisy sazy henjana kokoa hihatra amin’ilay vondrona audiovisuel frantsay.

Nangonin’i Nema Samiratou
FDM – Burki nafaso