𝐀𝐧𝐤𝐚𝐳𝐨𝐧𝐝𝐚𝐧𝐝𝐲 : 𝐧𝐢𝐟𝐚𝐫𝐚𝐧𝐚 𝐭𝐚𝐦𝐢𝐧’𝐧𝐲 𝐟𝐢𝐟𝐨𝐧𝐚𝐧𝐚 𝐚𝐦𝐩𝐚𝐡𝐢𝐛𝐞𝐦𝐚𝐬𝐨 𝐧𝐲 𝐫𝐚𝐡𝐚𝐫𝐚𝐡𝐚 𝐟𝐚𝐧𝐝𝐫𝐚𝐡𝐨𝐧𝐚𝐧𝐚 𝐦𝐩𝐚𝐧𝐚𝐨 𝐠𝐚𝐳𝐞𝐭𝐲

Araka ny fanazavana voaray, nandritra ny fanatanterahany ny asany no voalaza fa nisy tovolahy iray nandrahona sy naniratsira azy, ary nikasa hampiasa herisetra taminy sy tamin’ireo ekipa niaraka taminy. Noho izany, nitondra fitarainana teo anivon’ny CT-OJM sy ny fikambanana APPEL ilay mpanao gazety, mba hiarovana ny zon’ny mpanao gazety sy ny fahalalahan’ny asa fanaovan-gazety.

Taorian’ny fifandraisana nataon’ny CT-OJM sy ny APPEL tamin’ireo tomponandraikitra any an-toerana, tonga teny amin’ny Birao Foiben’ny OJM, Ambohidahy, ilay tovolahy voatonona amin’ny raharaha, fantatra amin’ny anarana hoe Rajo, nitondra fialan-tsiny sy fifonana ampahibemaso. Nanatrika izany ny CT-OJM, Ramatoa Felicia Davisonne, Nyh Gabriel Andriamitantsoa, Sekretera Jeneralin’ny APPEL, ary mpikambana vitsivitsy ao amin’ny APPEL, niaraka tamin’ny solontenan’ny Kaominina Ankazondandy sy ilay mpanao gazety tompon’antoka tamin’ny fitarainana.

Ity raharaha ity dia mampahatsiahy fa tsy fahavalo ny mpanao gazety, fa mpanangom-baovao sy mpampita ny zava-misy eny anivon’ny fiaraha-monina. Tokony hajaina ny asany, indrindra rehefa eo am-panatanterahana iraka ara-baovao izy. Etsy ankilany, ilaina hatrany ny fifampiresahana sy ny fitoniana rehefa misy disadisa, satria ny fanajana ny fahalalahan’ny asa fanaovan-gazety sy ny fitandroana ny filaminana dia samy zava-dehibe ho an’ny demokrasia sy ny vahoaka.