𝐊𝐈𝐀𝐍𝐉𝐀 𝐁𝐀𝐑𝐄𝐀 𝐌𝐀𝐇𝐀𝐌𝐀𝐒𝐈𝐍𝐀
Nambaran’ny fitantanana fa misy ny fanavaozana sy fanatsarana eo anivon’ny KBM
Notanterahina teny amin’ny Kianja BAREA Mahamasina ny zoma 15 mey lasa teo ny fihaonana voalohany teo amin’ireo mpikambana ao amin’ny Filan-kevi-pitantanan’ny Société de Patrimoine Kianja BAREA SA (KBM) sy ireo mpiasan’ny Kianja BAREA Mahamasina.
Tonga nanotrona izany fihaonana izany ireo solontena avy amin’ny Minisiteran’ny Toekarena sy ny Fitantanam-bola (MEF) ary ny Kaominina Antananarivo Renivohitra (CUA), raha tsy afaka nanatrika kosa ireo avy amin’ny Minisiteran’ny Tanora sy ny Fanatanjahantena (MJS) noho ny fifanindrian’ny fandaharam-potoana.
Nandritra ny fotoana no nanolorana ny tatitry ny asa sy ireo fanavaozana notanterahina tao amin’ny KBM nanomboka tamin’ny nandraisan’i Dr Mady RASOLOVONINJATOVO ny fitantanana ny orinasa tamin’ny volana Aogositra 2025.
Anisan’ireo nambara tamin’izany ny fanomezana fifanarahana asa maharitra (CDI) ho an’ny mpiasa miisa 90 eo ho eo, ny fampidirana azy ireo ao amin’ny CNaPS sy ny fiantohana ara-pahasalamana, ary ny fananganana delegen’ny mpiasa.
Nambaran’ny tompon’andraikitra ihany koa fa nisy ny fanatsarana ny tontolon’asa, toy ny fametrahana “pointage biométrique”, ny fanajana ora fiasana manomboka amin’ny 8 ora maraina ka hatramin’ny 5 ora hariva, ary ny fampiharana ny fanaovana rosia amin’ireo vola rehetra miditra eo anivon’ny kianja.
Etsy ankilany, napetraka ihany koa ny cantine maimaimpoana ho an’ny mpiasa isanandro, ankoatra ny alahady.
Nisy rahateo ny fitsidihana ireo fotodrafitrasa ao anatin’ny Kianja BAREA Mahamasina, talohan’ny namaranana ny fihaonana tamin’ny fotoana ara-pirahalahiana niarahana tamin’ireo mpiasa rehetra.
Nanambara ny fahafaham-pony sy ny fahavononany hanohana hatrany ny fampandrosoana eo anivon’ny KBM ireo mpikambana ao amin’ny Filan-kevi-pitantanana, sady naneho ny fanantenany amin’ny fitohizan’ny fanavaozana sy ny ho avin’ny orinasa.
Nangonin’ Lay Mahitsy
