Nandray anjara tamin’ny fihaonambe iraisam-pirenena Africa Forward 2026 izay notanterahina tao amin’ny Kenyatta International Convention Centre ny Filohan’ny Fanavaozana ny Repoblika, Kolonely Randrianirina Michaël. Fihaonana lehibe nampivondrona ireo filoham-panjakana, praiminisitra ary tompon’andraikitra ambony avy amin’ny firenena sy fikambanana iraisam-pirenena maro manerana an’i Afrika sy ivelany izy ity.
Anisan’ireo mpitarika nandray anjara tamin’ny fihaonambe i William Ruto, Abdel Fattah el-Sisi, Bola Ahmed Tinubu ary Emmanuel Macron.
Nifantoka tamin’ny fanamafisana ny fiaraha-miasa ara-toekarena, ny fampandrosoana maharitra ary ny fanohanana ny sehatry ny fanavaozana aty Afrika ny dinika nandritra ity fihaonambe ity. Nandritra ny fandraisam-pitenenany dia nanasongadina ny fahavononan’i Madagasikara handray anjara amin’ny fampiroboroboana ny tetikasa fampandrosoana sy ny sehatra mamorona asa sy harinkarena ny Filohan’ny Fanavaozana.
Nasongadina ihany koa nandritra ny fihaonana ny maha zava-dehibe ny fiaraha-mientan’ireo firenena afrikanina amin’ny fanohanana ny fampiasam-bola sy ny fampandrosoana eny ifotony, mba hahafahana manatsara ny fari-piainan’ny vahoaka sy mampiroborobo ny fitomboana ara-toekarena maharitra eto amin’ny kaontinanta afrikanina.
