Naiditra am-ponja vonjimaika ireo olona telo mianaka voarohirohy ho nanao fisolokiana sy fitakiana vola tsy ara-dalàna tamin’ireo mpivarotra manamorona ny RN3, indrindra tao Ankazondady.
Araka ny fanazavan’ny Zandarmaria ao Talata-Volonondry, dia nilaza ho iraky ny Foiben-ketra eto Avaradrano ireo voarohirohy ary nanao fisavana taratasy “patente” tamin’ireo mpivarotra. Nampitahoriny sy norahonany ireo lasibatra mba hanerena azy ireo hanome vola.
Nandritra ny fisavana nataon’ny Zandary dia hita fa nampiasa karatra maha mpanao gazety sy “laissez-passer” tsy mifanaraka amin’ny “autocollant” ara-dalàn’ny OJM ireo voarohirohy mba hanamafisana ny fitaka nataony. Fantatra nandritra ny fanamarinana anefa fa tena mpanao gazety ilay lehilahy voakasika, saingy voalaza fa nomerao “matricule” an’olon-kafa no nampiasainy nandritra ny fisolokiana.
Nahitana akanjon’ny mpiasan’ny JIRAMA tao anatin’ilay fiara ihany koa, ka mampiahiahy ny mpanao famotorana fa mety efa nampiasaina tamina fisolokiana hafa izany.
Taorian’ny nisamborana azy ireo dia maro ireo olona tonga nametraka fitoriana. Efa mahatratra 15 ireo mpitory amin’izao fotoana izao, ary misy amin’izy ireo no very vola hatramin’ny 2 tapitrisa ariary.
Natolotra ny PAC etsy 67ha ny raharaha ny 11 mey 2026, ary naiditra am-ponja vonjimaika eny amin’ny Fonjaben’Avaradrano ireo voarohirohy, miandry ny fotoam-pitsarana azy ireo. Mitohy ny fanadihadiana.
Nangonin’lay Mahitsy
