FANAMBARANA OFISIALY
Momba ny filazana fandraisan’anjaran’ny AMF tamin’ny fivoriana tao Antanimora
Antananarivo, — Manoloana ny vaovao miely momba ny fisian’ny fivoriana notanterahina tao Antanimora, tao amin’ny toeram-ponenan’i Jeneraly Ramakavelo, ny alakamisy 02 Aprily 2026, izay nahitana solontena avy amin’ny vondrona sy fikambanana maro samihafa niresaka ny toe-draharaha ara-politika sy ara-tsosialy eto amin’ny firenena, dia nisy ny fanazavana ofisialy navoakan’ny Fikambanana AMF (Aroriaka Mitolona Ho an’ny Fanorenana).
Araka ny loharanom-baovao, dia voalaza fa isan’ireo nandray anjara tamin’ity fivoriana ity ny AMF, niaraka tamin’ireo fikambanana sy vondrona toy ny KMT province, ANTAFA, Servir Mada, GENZ, GENZ Madagascar National Ofisialy, mouvement Gen Z, ary ireo mpandala ny fomban-drazana sy fikambanana hafa.Na izany aza anefa, araka ny fanambarana nataon’Andriamatoa RAKOTONIRINA Ganguy Rina, Filoha Nasionalin’ny AMF, dia lavin’ny Fikambanana tanteraka izany filazana izany. Nohamafisiny fa tsy nandray anjara velively tamin’io fivoriana io ny AMF, ary tsy tompon’antoka amin’ireo fanapahan-kevitra rehetra mety ho nivoaka tamin’izany.
Nanampy hatrany ny fanazavana fa ny fanapahan-kevitra raisin’ny Fikambanana AMF dia tsy maintsy avy amin’ny fifampidinihana sy fankatoavana iombonan’ny mpikambana ao aminy, araka ny rafitra sy ny fitsipika anatiny mifehy azy.
Amin’ny alalan’ity fanambarana ity, dia maniry ny hanitsy ny vaovao diso miely sy hiaro ny fahamarinan’ny toerana ijoroan’ny Fikambanana ny tompon’andraikitra.
Ho ela velona i Madagasikara.
Ny Filoha Nasionaly
RAKOTONIRINA Ganguy Rina
