𝗧𝗢𝗔𝗠𝗔𝗦𝗜𝗡𝗔 : 𝗙𝗮𝗻𝗼𝗵𝗮𝗻𝗮𝗻𝗮 𝗶𝗿𝗲𝗼 𝗮𝗻𝗸𝗶𝘇𝘆 𝘁𝗿𝗮-𝗯𝗼𝗶𝗻𝗮 𝘁𝗮𝗼𝗿𝗶𝗮𝗻’𝗻𝘆 𝗿𝗶𝘃𝗼𝗱𝗼𝘇𝗮 𝗚𝗲𝘇𝗮𝗻𝗶, 𝗮𝗻𝗸𝗶𝘇𝘆 𝗺𝗮𝗵𝗲𝗿𝗶𝗻’𝗻𝘆 𝟯 𝟬𝟬𝟬 𝗻𝗼 𝗻𝗶𝘀𝗶𝘁𝗿𝗮𝗸𝗮 𝗳𝗮𝗻𝗮𝗺𝗽𝗶𝗮𝗻𝗮

Taorian’ny nandalovan’ilay rivodoza mahery vaika Gezani dia nanatanteraka hetsika fanohanana ho an’ireo ankizy mpianatra tra-boina any Toamasina ny fikambanana Làlan’i Madagasikara.

Nitarika izany ny Mpandrindra Nasionaly, Atoa Fenofitondrana Rakotozanakajy, izay niaraka tamin’ny ekipany nizara fitaovam-pianarana ilaina andavanandro, toy ny cahier sy stylos (mainty, mena ary manga), ary koa “kits solaires” ahafahan’ireo ankizy mamahana finday amin’ny toerana mbola tsy ahitana herinaratra.

Fokontany maro no notsidihin’ny ekipa, ka ny Filohan’ny Fokontany tsirairay avy no nanome ny lisitry ny tokantrano sy ankizy tena sahirana sy tra-boina. Araka ny tatitra voaray, ankizy maherin’ny 3 000 no efa nisitraka mivantana ireo fanampiana ireo.

Ankoatra ny fanomezana ara-pitaovana dia mbola mitohy ny hetsika ara-tsosialy, izay hatao isaky ny asabotsy, ahitana asa fanadiovana, fikarakarana fahadiovan’ny vatana (fanalana hoho, fampandroana, fanasana lamba), ary fiaraha-misakafo amin’ireo ankizy sy fianakaviana tra-boina.

Tsy voafetra amin’izany ihany anefa ny vinan’ny tetikasa. Efa eo am-panaovana fandinihana ihany koa ny fametrahana “containers” azo avadika ho trano fonenana mahazaka rivo-doza, izay kasaina hanampiana fianakaviana maro very trano vokatry ny loza.

Ity hetsika ity dia tanterahina ao anatin’ny fiaraha-miasa amin’ny Fondation Terra Futura, fikambanana iraisam-pirenena manana foibe any Suisse, ary tafiditra ao anatin’ny fandaharanasan’ny Office National pour la mise en place et le suivi des Projets à Impact Rapide multisectoriels izay tarihin’i Atoa Rija Rakotozanakajy.

Araka ny nambaran’ireo tompon’andraikitra, ny fanohanana ny fanabeazana sy ny fahalalan’ny ankizy no antoka lehibe hiarovana ny hoavin’ny firenena. Ankizy manana fahalalana sy fahatsiarovan-tena no afaka misafidy ny lalana marina, ka tsy ho mora voafitaky ny fanamby sy ny fanararaotana mety hatrehiny rahatrizay.

Mitondra hafatra mazava ny hetsika : tsy irery i Toamasina. Ny firaisankina sy ny fifanomezan-tanana no lakilen’ny fanarenana maharitra.

Loharano : Lalanimadagasikara.com
✍️ RA PA