Nanomboka tamin’ny herinandro teo dia tazana tao amin’ny tambazotra sosialy facebook ny pejy mitondra ny anaran’ny antoko Ny Safidin’I Madagasikara ; «Handeha hanarina ny firenena ho fanohizana ny tolona » io no fanehoan-kevitra voalohany nataon’ity antoko ity tao amin’ny pejiny.
Raha tsiahivina, nijoro tamin’ny taona 1996, ary ny Praiminisitra teo aloha ny Jeneraly Désiré RAKOTOARIJAONA no filoha mpanorina ity antoko ity. Foto-kevitra isan’ny nijoroany ny fanaovana ho laharam-pahamehana ny fampandrosoana ara-toekarena, tamin’ny alalan’ny fanampiana tosika ny mpandraharaha madinika sy salantsalany ho fampiroboroboana ny famoronana asa ho an’ny Malagasy sy ho amin’ny fanatsarana ny fahefa-mividin’ny isan-tokantrano.
Isan’ny nanamarika ny raharaham-pirenena tany amin’ny Repoblika faharoa ny antoko NY SAFIDIN’I MADAGASIKARA ; tao anatin’ny taona maro no nangina sy tsy tazana mivantana tamin’ny sehatry ny raharaham-pirenena ity antoko politika ity ka izao manomboka miseho izao indray ankehitriny
Tsy mbola nampahafantatra izay mety ho ankolafy politika hisy azy kosa ny antoko Ny Safidin’i Madagasikara amin’izao fahitana ny fiverenenany amin’ny raharaham-pirenena izao. Marihina anefa fa tsy manana kandida nirotsaka amin’ny fifidianana ben’ny tanana ho avy io ny antoko.
Nangonon’i RA PA
