𝐀𝐌𝐁𝐀𝐓𝐎𝐌𝐈𝐑𝐀𝐇𝐀𝐕𝐀𝐕𝐘 – 𝟐𝟔 𝐉𝐎𝐍𝐀 𝟐𝟎𝟐𝟓

Natao tamim-pomba miavaka sy manandanja ny fankalazana ny faha-65 taona niverenan’ny Fahaleovantenan’i Madagasikara teto amin’ny Kaominina Ambanivohitra Ambatomirahavavy, Distrika Arivonimamo, Faritra Itasy, ny 26 Jona 2025.

Natomboka tamin’ny fotoam-pivavahana am-pilaminana sy am-panetren-tena ny lanonana, ho fanolorana ny firenena sy ny vahoaka amin’ny Tompo. Narahina avy hatrany izany tamin’ilay fifaninanana mitondra kalesa, fanao sy fomban-drazana efa manamarika manokana ity faritra ity, maneho ny kolontsaina sy ny tantara manokana an’Ambatomirahavavy.

Diabe an-dalambe lehibe sy feno hafaliana no nandravaka ny andro, notarihin’Andriamatoa Ben’ny Tanàna 𝐑𝐚𝐧𝐝𝐫𝐢𝐚𝐦𝐚𝐦𝐩𝐢𝐨𝐧𝐨𝐧𝐚 𝐓𝐨𝐥𝐨𝐭𝐫𝐚 , niaraka tamin’ireo mponina sy ankizy nahatrehana ny fankalazana, ka naneho firaisankina sy fitiavan-tanindrazana.

Tsy nijanona teo anefa ny fanamarihana fa nampiavaka manokana ity fankalazana ity ihany koa ny hetsika fambolen-kazo izay natao ho toy ny lova sy fanamby ho an’ny taranaka ho avy. Nampahatsiahy izany fa ny fahaleovantena dia tsy fotsiny fahatsiarovana, fa andraikitra entina manohy manangana sy miaro ny ho avy.