Matetika no tsy dia voaresaka sy tsy misongadina firy ny tontolo ambanivohitra eo amin’ny sehatry ny fizahantany kanefa manana ny mampiavaka azy raha tsy ilaza toy ny rivotra , ny sakafo, ny manodidina ny fambolena sy ny fiompiana ary ny maro hafa.
Mbola azo trandrahana tsara ary miavaka kely amin’ny mahatra ahafahana mampiroborobo ny fizahantany ny ambanivohitra ary ahafahana manatratra miaraka amin’ny vina napetraka dia ny ahatongavan’ny mpizahantany 1 tapitrisa eto Madagasikara amin’ny 2030.
Ho fampahafantarana ireo tolotra sy vokatra ara-pizahantany any ambanivohitra indrindra no anton’ny foara ho fampiroboroboana ny fizahantany ambanivohitra.
Ho tontosaina ny 17 hatramin’ny 18 Aprily ho avy izao ny andiany voalohany; trano heva 30 mahery no handray anjara ary hanasongadina vokatra malagasy avokoa.
Akoatr’izay , hampifandray ireo mpandraharaha amin’ny sehatry ny fizahantany ambanivohitra ity hetsika ity toy ireo mpanao asa tanana, mpamboly sy mpiompy.
Mbola manano-sarotra kosa anefa ny fanatanterahana hetsika any ambanivohitra ka antony hanatanterahana ny andiany voalohany eto Antananarivo amin’ity andiany voalohany ity hoy ny tompon’andraikitra eo anivon’ny ATM Consulting.
M.Elvina
