𝐀𝐦𝐛𝐚𝐭𝐨𝐥𝐚𝐦𝐩𝐲: 𝐯𝐢𝐭𝐚 𝐭𝐚𝐧𝐭𝐞𝐫𝐚𝐤𝐚 𝐧𝐲 𝐟𝐚𝐧𝐚𝐦𝐛𝐨𝐚𝐫𝐚𝐧𝐚 𝐧𝐲 𝐭𝐞𝐭𝐞𝐳𝐚𝐧𝐚 𝐧𝐚𝐦𝐩𝐢𝐭𝐚𝐫𝐚𝐢𝐧𝐚 𝐧𝐲 𝐯𝐚𝐡𝐨𝐚𝐤𝐚 𝐞𝐟𝐚 𝐚𝐦𝐚𝐧-𝐭𝐚𝐨𝐧𝐚𝐧𝐲 𝐦𝐚𝐫𝐨

“Miroso hatrany isika, asa fa tsy kabary.” Io hafatra fohy nefa mafonja io no nentin’ny Ben’ny Tanànan’ny Kaominina Ambatolampy, Andriamatoa Mika DIMBINIAVO, nanamarika ny fahavitan’ny fanamboarana ny tetezana iray ao an-tanànan’Ambatolampy, fotodrafitrasa efa nampitaraina ny mponina sy ireo mpampiasa lalana nandritra ny taona maro.

Vita tanteraka ankehitriny ny asa fanarenana, ka afaka ampiasain’ny rehetra manomboka androany ity tetezana ity. Tombontsoa lehibe ho an’ny mponina izany, satria hanamora ny fivezivezena andavanandro sy hanatsara ny fifamoivoizana ao an-toerana.

Nohamafisina fa vokatry ny hetra, ny adidy ary ny ezaka iombonan’ny tsirairay no nahafahana nanatanteraka ity asa ity. Azo lazaina ho “angady nananana sy vy nahitana” ny fandraisan’andraikitry ny rehetra, ka antenaina fa ho fotodrafitrasa haharitra sy ho lovain-jafy ity tetezana nohavaozina ity.

Entanina araka izany ny vahoaka mba samy ho saro-piaro amin’ity fotodrafitrasa iombonana ity, hitandrina azy ary hanaja ny fepetra fampiasana azy. Tsiahivina manokana fa 5 taonina ihany ny lanja ambony indrindra napetraky ny Génie DMA, izay nanamboatra ity tetezana ity tamin’ny 23 martsa 1951.

: Mika Dimbiniavo