Eny ifotony no manomboka ny fiarovana ny vahoaka
Nofaranana androany 19 Martsa 2026 tao amin’ny Distrikan’Antananarivo faha-III ny hetsika fanentanana sy fampahafantarana momba ny ady amin’ny famarinana olombelona, hetsika nokarakarain’ny BNLTEH ho an’ireo Lehiben’ny Fokontany eto Antananarivo Renivohitra.
Fantatra fa Distrika manana Fokontany betsaka indrindra eto an-drenivohitra i Antananarivo faha-III, izay ahitana Fokontany miisa 34. Ao Antaninandro no misy ny biraon’ny Distrika, ary Ramatoa Razafindranaivo Harikanto Donnie Alexia, Lehiben’ny Distrika, no nanokatra tamin’ny fomba ofisialy ny fotoana.
Nandritra ny fiofanana dia nisy ny fanazavana mikasika ireo singa mamaritra ny famarinana olombelona sy ireo endrika isehoany eo anivon’ny fiarahamonina. Nandray anjara mavitrika tamin’ny fifanakalozan-kevitra ireo Lehiben’ny Fokontany, tamin’ny alalan’ny fanontaniana sy fanamarihana, izay nampiseho ny fahavononany handray andraikitra amin’ny ady amin’ity tranga mampidi-doza ity.
Notsindriana nandritra ny hetsika fa eny ifotony no isehoan’ny ankamaroan’ny fanararaotana, ka ireo tompon’andraikitra akaiky ny vahoaka, toy ny Lehiben’ny Fokontany, no apetraka ho andry voalohany amin’ny fisorohana sy fanairana. Inoana fa ny fahamalinana sy ny fahavononan’izy ireo dia afaka manampy betsaka amin’ny fisorohana mialoha ireo tranga mety hitranga.
Mitohy araka izany ny ezaka iombonana entina manangana fiarahamonina malina sy voaaro amin’ny famarinana olombelona, amin’ny alalan’ny fiaraha-miasan’ny rafitra samihafa sy ireo tompon’andraikitra eny ifotony.
Nangonin’lay Mahitsy
