MORONI — Nanao hetsika am-pilaminana tao amin’ny kianja Baumerde, ao Moroni, omaly ireo Malagasy monina sy miasa atsy Comores. Ny tena fototry ny fitakian’izy ireo dia ny hamerenana amin’ny laoniny sy hanokafana indray ny Masoivohon’i Madagasikara ao Comores, izay efa taona maro no tsy miasa.
Araka ny nambaran’ireo mpiray tanindrazana nandray anjara tamin’ny hetsika, efa ho fito taona izao no tsy manana masoivoho malagasy miasa ao Comores ireo Malagasy monina any an-toerana. Toe-javatra iray izay, hoy izy ireo, miteraka fahasahiranana lehibe eo amin’ny fikarakarana ireo raharaha ara-panjakana sy ara-kaonsily.
Notsindrian’izy ireo ihany koa fa manana solontena ara-diplaomatika sy kaonsily eto Madagasikara i Comores, ka manamafy ny fanontanian’izy ireo momba ny antony mbola tsy hisian’ny solontena malagasy maharitra afaka miaro sy manampy ireo teratany Malagasy any Comores.
TENA ILAINA NY MASOIVOHO MALAGASY AO COMORES
Tsy resaka endrika ara-diplaomatika fotsiny ny fananana masoivoho any amin’ny firenena iray. Fitaovana tena ilaina hiarovana ny zo sy ny tombontsoan’ny teratany Malagasy any ivelany izany, indrindra rehefa sendra olana ara-panjakana, ara-pitsarana, ara-piasana na toe-javatra maika ny olom-pirenena.
Ho an’ireo Malagasy mila ravinahitra ao Comores, ny tsy fisian’ny masoivoho akaiky dia mety hanasarotra ny fikarakarana taratasy, ny raharaha ara-kaonsily ary ny fangatahana fanampiana amin’ny manampahefana malagasy rehefa misy olana. Mahatsiaro ho tsy manana toerana ofisialy hianteherana izy ireo rehefa tojo fahasahiranana any an-tanin’olona.
Noho ny fifanakaikezan’i Madagasikara sy Comores, ny fivezivezen’ny olona ary ny fifandraisana ara-tsosialy sy ara-toekarena misy eo amin’ny firenena roa tonta, dia tena zava-dehibe ny fisian’ny solontena ara-diplaomatika malagasy miasa sy mahomby ao an-toerana.
Izany indrindra no antso avo nataon’ireo Malagasy nivory tao Moroni: handray andraikitra sy handinika haingana ny hamerenana ny Masoivohon’i Madagasikara ao Comores ny Fanjakana Malagasy, mba tsy hahatsiaro ho irery intsony ireo mpiray tanindrazana monina sy miasa any.
Loharanom-baovao: © Twamaya Infos
