𝐊𝐚𝐨𝐦𝐢𝐧𝐢𝐧𝐚 𝐁𝐞𝐭𝐬𝐨𝐡𝐚𝐧𝐚 𝐧𝐚𝐧𝐤𝐚𝐥𝐚𝐳𝐚 𝐧𝐲 𝐟𝐚𝐡𝐚-𝟔𝟔 𝐭𝐚𝐨𝐧𝐚𝐧’𝐧𝐲 𝐅𝐚𝐡𝐚𝐥𝐞𝐨𝐯𝐚𝐧𝐭𝐞𝐧𝐚 𝐭𝐚𝐨 𝐚𝐧𝐚𝐭𝐢𝐧’𝐧𝐲 𝐟𝐢𝐫𝐚𝐢𝐬𝐚𝐧𝐤𝐢𝐧𝐚 𝐬𝐲 𝐟𝐢𝐥𝐚𝐦𝐢𝐧𝐚𝐧𝐚

Rindran-kira, lalao isan-karazany, filaharana nandraisan’ireo hery velona ao an-toerana anjara, ary fotoam-pivavahana firaisam-pinoana no anisan’ireo hetsika lehibe nandravaka ny fankalazana tao Betsohana. Naneho firaisankina ny mponina sy ireo tompon’andraikitra isan-tsokajiny, ka nahatonga ny lanonana hizotra tamim-pilaminana.

Nankasitraka manokana ny fandraisan’anjaran’ny vahoaka ny Ben’ny Tanànan’i Betsohana, Andriamatoa ANDRIANARISOA Heriniaina James. Nambarany fa ny fahamendrehana nasehon’ny mponina nandritra ny fankalazana dia porofon’ny fitiavan-tanindrazana sy ny firaisankina ao amin’ny kaominina. Nisaotra ireo mpiara-miasa, ireo hery velona ary ny vahoaka rehetra izy noho ny fiaraha-mientana nahafahana nanatanteraka ny lanonana tao anatin’ny filaminana.

Araka ny nambaran’ny Ben’ny Tanàna, “ny hafanam-po sy ny firaisankina no antoka lehibe indrindra amin’ny fampandrosoana ny tanàna”. Nampitondrainy hafatra ihany koa ny mponina mba hitohizan’izany fihavanana sy fifanajana izany, satria fototra iorenan’ny fampandrosoana maharitra ho an’i Betsohana.

Tsiahivina fa anisan’ireo kaominina manana vokatra ara-pambolena i Betsohana. Na izany aza, mbola voalaza ho iray amin’ireo sakana lehibe amin’ny fampandrosoana ny fahasarotan’ny lalana mihazo ny tanàna, indrindra ho an’ireo tantsaha mitondra ny vokatra. Noho izany, misy ny antso avo atao amin’ireo tompon’andraikitra mahefa mba hijery akaiky ity olan’ny fotodrafitrasa ity, hahafahana manamora ny fivezivezena sy manohana bebe kokoa ny fampandrosoana eny ifotony.