𝐓𝐨𝐚𝐦𝐚𝐬𝐢𝐧𝐚: 𝐓𝐬𝐲 𝐦𝐚𝐧𝐚𝐢𝐤𝐲 𝐟𝐢𝐭𝐬𝐚𝐛𝐚𝐡𝐚𝐧𝐚 𝐩𝐨𝐥𝐢𝐭𝐢𝐤𝐚 𝐚𝐦𝐢𝐧’𝐧𝐲 𝐫𝐚𝐡𝐚𝐫𝐚𝐡𝐚𝐦-𝐩𝐢𝐤𝐚𝐦𝐛𝐚𝐧𝐚𝐧𝐚 𝐧𝐲 𝐅𝐈𝐓𝐄𝐀𝐓𝐎

Araka ny fanazavan’ny tompon’andraikitra ao amin’ny FITEATO, dia tsy eken’izy ireo ny fikasana hanelingelina ny raharaham-pikambanana anatiny, indrindra raha misy ambadika politika na fanerena avy amin’ny vondron’olona ivelan’ny fikambanana. Nohamafisin’izy ireo fa manana ny sata sy fitsipika anatiny mifehy azy manokana ny FITEATO, ary mahaleo tena amin’ny fitantanana ny raharahany.

Raha tsiahivina, ny taona 2014 no niforona ny FITEATO, ary i Atoa LAHA Miarentsoa no filoha nanomboka tamin’izany. Nisy fotoana tsy dia nahazoana nanao hetsika firy teo anelanelan’ny taona 2019 sy 2021, noho ny valanaretina Covid-19. Tamin’ny faramparan’ny taona 2021 kosa dia nisy fifidianana, ka mbola i Atoa LAHA Miarentsoa no voafidy hitantana ny fikambanana.

Nambaran’ny filohan’ny FITEATO sy ny birao miaraka aminy fa mampalahelo ny mahita vondron’olona, araka ny filazan’izy ireo, mitady hampiasa ny fikambanana amin’ny kajy politika. Ho azy ireo, tsy tokony hatao fitaovana hisehoana etsy sy eroa ny fikambanana, fa tokony hijoro hatrany ho sehatra mampiray sy miaro ny tombontsoan’ny mpikambana.

Manoloana izany, nilaza ireo mpikambana maro an’isa ao amin’ny FITEATO eto Toamasina fa tsy hanatrika ny fivoriana sy fifidianana kasaina hatao rahampitso. Nohamafisin’izy ireo anefa fa tsy manohitra ny fanjakana mijoro izy ireo, ary tsy fikambanana manao politika ny FITEATO.

Ny tanjona, hoy izy ireo, dia ny hitandroana ny firaisankina, ny fahaleovantenan’ny fikambanana, ary ny fanampiana ara-tsosialy ireo mpikambana Terak’i Androy monina aty an-tany lavitra.