𝐌𝐚𝐫𝐨𝐯𝐨𝐚𝐲 : 𝐍𝐨𝐬𝐨𝐤𝐚𝐟𝐚𝐧𝐚 𝐭𝐚𝐦𝐢𝐧’𝐧𝐲 𝐟𝐨𝐦𝐛𝐚 𝐨𝐟𝐢𝐬𝐢𝐚𝐥𝐲 𝐧𝐲 𝐟𝐢𝐟𝐚𝐧𝐢𝐧𝐚𝐧𝐚𝐧𝐚 𝐚𝐫𝐚-𝐩𝐚𝐧𝐚𝐭𝐚𝐧𝐣𝐚𝐡𝐚𝐧𝐭𝐞𝐧𝐚 𝐚𝐧-𝐭𝐬𝐞𝐤𝐨𝐥𝐲 “𝐒𝐚𝐫𝐨𝐦𝐛𝐚𝐤𝐚 𝟐𝟎𝟐𝟔”

Tonga nandray anjara avokoa ireo ZAP 13 ao anatin’ny CISCO Marovoay, maneho ny firaisankina sy ny fahavononan’ny tanora mpianatra amin’ny sehatry ny fanatanjahantena. Marihina fa ireo ekipa sy mpandresy mendrika indrindra amin’ity fifaninanana ity no hisolo tena an’i Marovoay amin’ny fifaninanana rejionaly izay hatao any amin’ny faritra Boeny.

Nanome voninahitra ny lanonana ireo tompon’andraiki-panjakana sy olo-manankaja maro, isan’izany ny solontenan’ny lehiben’ny distrika, ireo parlemantera, ny PDS-n’i Marovoay, ny tompon’andraikitra misahana ny fanatanjahantena ao amin’ny CISCO, ary koa ireo manampahefana sivily sy miaramila.

Ankoatra ny fifaninanana ara-panatanjahantena dia mikendry ihany koa ny hampiroborobo ny soatoavina toy ny firaisankina, ny fifanajana ary ny fahaiza-miara-miasa eo amin’ny samy mpianatra ny hetsika “Sarombaka 2026”.

Hitohy mandritra ny andro maromaro ny fifaninanana, ka aorian’izany vao ho fantatra ireo hisolo tena ny distrikan’i Marovoay amin’ny dingana manaraka.