Nitondra fanazavana ofisialy ny Agence des Transports Terrestres (ATT) fa mbola tsy hampiharina amin’izao fotoana izao ireo lalàna vaovao mahakasika ny permis sy carte grise ho an’ny môtô eto Madagasikara.
Tsiahivina fa nisy ny fanambarana nivoaka teo aloha nilaza fa tsy maintsy manana permis de conduire sy carte grise avokoa ireo môtô rehetra mivezivezy eto amin’ny firenena. Izany vaovao izany no niteraka resabe sy ahiahy teo amin’ireo mpampiasa môtô maro manerana ny Nosy.
Na izany aza anefa, nanamafy ny ATT fa mbola eo am-panomanana sy fifampidinihana miaraka amin’ireo tompon’andraikitra voakasika ny fampiharana ireo fepetra vaovao ireo. Midika izany fa mbola tsy misy fampiharana avy hatrany amin’izao dingana izao.
Araka ny fanazavana, mbola ilaina ny fandrindrana ara-teknika sy ara-pitantanana alohan’ny hanombohana amin’ny fomba ofisialy ny fanatanterahana izany lalàna izany, mba hisorohana ny korontana sy hanamorana ny fanarahan’ny rehetra azy.
📌 Miantso ny vahoaka ny ATT mba hanaraka ireo fanambarana ofisialy ihany ary tsy ho taitra manoloana ireo vaovao tsy voamarina miparitaka amin’ny tambajotra sosialy.
🚦 Raha vao misy fanapahan-kevitra ofisialy sy daty mazava momba ny fampiharana ireo fepetra vaovao, dia hambara amin’ny fomba ofisialy amin’ny vahoaka izany.
Nangonin ‘Lay Mahitsy
