𝐅𝐈𝐀𝐑𝐀𝐇𝐀-𝐌𝐈𝐀𝐒𝐀 𝐀𝐑𝐀-𝐏𝐈𝐓𝐒𝐀𝐑𝐀𝐍𝐀 | 𝐌𝐚𝐝𝐚𝐠𝐚𝐬𝐢𝐤𝐚𝐫𝐚 – 𝐐𝐚𝐭𝐚𝐫

Tao anatin’ny fanatanterahana ny fivoriana faha-11 an’ireo Firenena Mpikambana ao amin’ny Fifanarahan’ny Firenena Mikambana hiadiana amin’ny kolikoly (COSP11), notontosaina tao Doha, no nanatanterahana fihaonana ara-diplaomatika teo amin’ny Mpitahiry ny Fitombokasem-panjakana sady Minisitry ny Fitsarana Malagasy, Ramatoa Fanirisoa Ernaivo, sy Andriamatoa Masoud bin Mohammed Al Amri, Minisitry ny Fitsarana ao amin’ny Fanjakan’i Qatar.

Nifantoka indrindra tamin’ny fanamafisana ny fiaraha-miasa ara-pitsarana eo amin’i Madagasikara sy i Qatar ny fifanakalozan-kevitra, indrindra eo amin’ny ady amin’ny kolikoly, ny fanatsarana ny fitantanana ny raharaham-panjakana ary ny fanofanana sy fanamafisana ny fahaiza-manao ho an’ireo mpitsara sy mpisehatra ara-pitsarana.

Nambaran-dRamatoa Minisitry ny Fitsarana Malagasy nandritra izany fa vonona tanteraka i Madagasikara haka lesona sy handray ireo fomba fanao tsara efa voaporofo ampiharina ao Qatar, indrindra eo amin’ny sehatry ny mangarahara, ny fahamarinana ary ny fitantanana mahomby ny raharaham-bahoaka.

Nandeha tao anatin’ny toe-tsaina fifampitokisana sy fifanajana tanteraka ny fihaonana, ka nanokatra làlana vaovao ho amin’ny fiaraha-miasa maharitra sy mahasoa ho an’ny roa tonta, ho fanamafisana ny rariny, ny fitantanana tsara ary ny fampandrosoana maharitra.