𝐕𝐎𝐕𝐎𝐍𝐀𝐍𝐀 𝐈𝐅𝐑 | 𝐌𝐢𝐣𝐨𝐫𝐨 𝐚𝐦𝐢𝐧’𝐧𝐲 𝐟𝐨𝐦𝐛𝐚 𝐨𝐟𝐢𝐬𝐢𝐚𝐥𝐲 𝐧𝐲 𝐈𝐯𝐨𝐧’𝐧𝐲 𝐅𝐚𝐧𝐚𝐯𝐚𝐨𝐳𝐚𝐧𝐚 ny 𝐑𝐞𝐩𝐨𝐛𝐥𝐢𝐤𝐚

Ny zoma 13 febroary 2026 lasa teo no nambaran’ny fomba ofisialy teo anatrehan’ny mpanao gazety ny fisian’ny vovonana 𝑰𝑭𝑹 (𝑰𝒗𝒐𝒏’𝒏𝒚 𝑭𝒂𝒏𝒂𝒗𝒂𝒐𝒛𝒂𝒏𝒂 𝒏𝒚 𝑹𝒆𝒑𝒐𝒃𝒍𝒊𝒌𝒂).

Fihaonana natao hampahafantarana ny rafitra sy ny mpikambana ao aminy, ary indrindra ny làlana hizoran’ity fikambanana politika vaovao ity eo amin’ny sehatra nasionaly.

Araka ny fanazavana nomen’ireo tompon’andraikitra, dia vovonana iray ahitana antoko politika sy fikambanana maro loko, avy eto an-toerana sy avy any ivelan’i Madagasikara, ny IFR. Tafiditra ao anatiny ihany koa ny olom-boafidy sasantsasany, anisan’izany ireo solombavambahoaka mitovy fijery sy mitovy vina momba ny hoavin’ny firenena.

Nambaran’ireo mpitarika fa efa mijoro ara-dalàna sy ara-drafitra ny IFR, ary vonona handray anjara feno amin’ny fiainam-pirenena. Tsy fikambanana miseho fotsiny, hoy izy ireo, fa sehatra iray hiaraha-mandinika sy hiaraha-mamolavola politika ho an’ny tombontsoam-bahoaka.

𝐓𝐚𝐧𝐣𝐨𝐧𝐚 𝐦𝐚𝐳𝐚𝐯𝐚 𝐬𝐲 𝐯𝐢𝐧𝐚 𝐦𝐚𝐡𝐚𝐫𝐢𝐭𝐫𝐚

Nasongadina manokana fa hitondra sosokevitra sy vahaolana azo ampiharina ho an’ny fampandrosoana maharitra an’i Madagasikara no fototry ny IFR. Ny fanavaozana ny rafitra, ny fanamafisana ny fiandrianam-pirenena, ary ny fanomezana lanja ny rariny sy ny fahamarinana no isan’ny laharam-pahamehana apetrany.

Amin’ny lafiny asa sosialy kosa, nambara fa hisy delegasiona IFR hihazo an’i Toamasina amin’ny alatsinainy ho avy izao. Tanjon’izany ny hanome fanohanana sy fanampiana ho an’ireo fianakaviana traboina vokatry ny rivodoza Cyclone Gezani, izay namely faritra maro tato ho ato.

𝐈𝐫𝐞𝐨 𝐦𝐩𝐢𝐤𝐚𝐦𝐛𝐚𝐧𝐚 𝐦𝐚𝐧𝐝𝐫𝐚𝐟𝐢𝐭𝐫𝐚 𝐧𝐲 𝐈𝐅𝐑

Hatreto dia ireto avy ireo rafitra sy vondrona tafiditra ao anatin’ny Ivon’ny Fanavaozana Repoblika (IFR) :

GRAD ILOAFO

Antso ho an’ny Rariny anaty Fiandrianam-pirenena

Groupe BERTIN

GEN Z

Isika Mpandresy

Leader Fanilo

Madagasikarantsika

Diaspora Malagasy

Mijoro amin’ny foto-kevitra iray iraisana izy ireo : fanavaozana mitondra fahamarinana sy fampandrosoana.

Raha ny nambaran’ny mpitarika azy, dia ny fiaraha-mientana sy ny firaisan-kina no lakilen’ny fanovana maharitra, amin’ny fanajana ny soatoavina repoblikana sy ny tombontsoam-pirenena ambony indrindra.