Nanambara tamin’ny fomba ofisialy ny fametraham-pialany ny Ben’ny Tanànan’Antsirabe Renivohitra, Dr RASAMIMANANA Honoré Gabriel, fantatra amin’ny anarana hoe Dr UNOH, nandritra ny fotoana fananganan-tsaina notanterahina ny marainan’ny Alatsinainy.
Tao anatin’izany no nilazan’ity lehiben’ny kaominina ity ny fanapahan-keviny hiala amin’ny toerany, ka nahasarika ny sain’ny mpiasan’ny kaominina sy ireo mponina maro ao an-drenivohitr’i Vakinankaratra. Tsy mbola nambara tamin’ny fomba ofisialy anefa hatreto ny antony nanosika izao fametraham-pialana izao.
Taorian’ity fanambarana ity dia maro no miandry ny fanapahan-kevitry ny fitondram-panjakana foibe momba ny fanendrena izay ho PDS (Président de Délégation Spéciale) hitantana vonjimaika ny Kaominina Ambonivohitra Antsirabe, mandra-pisian’ny dingana vaovao ara-pitantanana.
Tsiahivina fa isan’ireo tanàna lehibe sy manana lanja ara-toekarena eto Madagasikara i Antsirabe, ka antenaina fa hisy fiantraikany eo amin’ny raharaham-pitantanana sy ny fiainan’ny mponina ao an-toerana ity fiovana tampoka eo anivon’ny kaominina ity.
Nangonin’i Haintso Antsirabe
