Nisy sambo vedette haingam-pandeha hita fefikin’ny ranomasina tao amin’ny fari-dranomasin’i CR Imorona. Tsy nisy anarana na taratasy manamarina io sambo io, fa hita fa mitondra laharana PPC 5820-OL-12. Teratany maorisianina telo no tao anatiny. Nilaza izy ireo fa nanaovana fitsapana an-dranomasina ilay vedette, ary nony avy eo dia nitsingevana nandritra ny 19 andro ka tonga taty amin’ny morontsirak’i Madagasikara. Na dia nandeha an-dranomasina nandritra izany fotoana lava izany aza, dia samy salama tsara izy telo, tsy nisy soritr’aretina, tsy nisy famantarana loza na fahavoazana. Niavaka koa ny toe-javatra satria samy nitondra finday izy telo, nefa tsy nisy niantso fanampiana na nanome vaovao nandritra ireo 19 andro. Tsy mifanaraka amin’ny sambo mpanjono ny endrika sy ny fitaovan’ilay vedette. Fitaovana tsotra “fintana” ihany no hita, izay tsy ampy hanaporofoana fa nandeha hitady hazandrano izy ireo. Mipetraka arak’izany ny fanontaniana 
Misokatra ny fanadihadiana ataon’ny manam-pahefana, ary nogiazana avokoa ireo fitaovana rehetra hita tao anatin’ilay sambo ho pièce à conviction. Nisy koa ny fikasan’ny fokonolona haka ilay vedette, saingy tsy nahazoana alalana izany satria tsy nisy fankatoavana ara-panjakana na avy amin’ny tompony ka tsy azo ekena ary tsy afaka alaina amin’ny fomba tsy ara-dalàna.
Hafatra ho an’ny vahoaka :Miantso antsika rehetra ny mpitandro filaminana mba hanaja sy hanaraka ny lalàna.
Aoka tsy hanaiky hoentin’olona amin’ny lalàna diso isika, izay mety hamitaka sy hanimba ny tenanao sy ny fiaraha-monina.
Tsy azo ekena ny fanararaotana ny zava-misy sy ny fahavoazan’olona.Aoka isika rehetra ho tonga saina, hanara-dalàna, ary hanaja ny fitsipika mifehy eto amin’ny tany sy fanjakana.Nangonin`i Kamisy Odino
