Fiarovam-pirenena — Fanavaozana lehibe eo anivon’ny Zandarimariam-pirenena

Hoentina manakaiky kokoa ny vahoaka sy hamaly ny filàn’ny fiarahamonina amin’izao fotoana izao ny fanovana goavana kasaina hapetraka eo anivon’ny Zandarimariam-pirenena. Ao anatin’ny fandaharana “Fiarovam-pirenena” anio alahady no hanazavan’ny Général de Brigade MAMELISON Mbina Nonos, Komandin’ny Zandarimariam-pirenena, ireo lafiny manan-danja amin’ny politika vaovao entin’ny hery fiandrianana.

𝗔𝗻𝗶𝘀𝗮𝗻’𝗻𝘆 𝘁𝗲𝗯𝗼𝗸𝗮 𝗹𝗲𝗵𝗶𝗯𝗲 𝗵𝗼𝗿𝗲𝘀𝗮𝗵𝗶𝗻𝗮:

• 𝗙𝗮𝗻𝗼𝘃𝗮𝗻𝗮 𝗻𝘆 𝗳𝗼𝗺𝗯𝗮 𝗳𝗶𝗮𝘀𝗮 𝗵𝗼 𝗮𝗻’𝗻𝘆 𝗭𝗮𝗻𝗱𝗮𝗿𝘆

Nambarany fa hiova tanteraka ny fomba fandraisana andraikitry ny Zandary eny ifotony. Kendrena ny hanamafisana ny fifandraisana mivantana amin’ny olom-pirenena, ny fanatsarana ny fandraisana fitarainana, ary ny fanaparitahana rafitra ahafahana mamaly haingana kokoa ny filàn’ny mponina.

• 𝐅𝐢𝐭𝐚𝐧𝐭𝐚𝐧𝐚𝐧𝐚 𝐦𝐚𝐧𝐠𝐚𝐫𝐚𝐡𝐚𝐫𝐚, 𝐚𝐝𝐲 𝐚𝐦𝐢𝐧’𝐧𝐲 𝐤𝐨𝐥𝐢𝐤𝐨𝐥𝐲

Hatsaraina hatrany ny fitantanana sy ny rafitra anatiny, ka kolikoly sy abus de pouvoir dia ho voasazy henjana. Nasongadin’ny Komandy fa tsy maintsy miverina amin’ny lanjan’ny asa sy ny etika ny Zandary, ka hapetraka ireo mekanisma hanamafisana ny fahadiovan’ny asa sy ny andraikitra.

• 𝗙𝗶𝗳𝗮𝗻𝗶𝗻𝗮𝗻𝗮 𝗵𝗶𝗱𝗶𝗿𝗮𝗻𝗮 𝗵𝗼 𝗭𝗮𝗻𝗱𝗮𝗿𝘆

Ho entina ao anatin’ny fandaharana ihany koa ny fanazavana mazava momba ny fifaninana hidirana ho Zandary, izay antenaina hisokatra amin’ny fomba mirindra sy mangarahara. Ho fantarina ireo dingana, fepetra ary fitsipika vaovao, ka kendrena ny hisarika tanora manan-kery sy mendrika hiroso amin’ny asa fiarovam-pirenena.

Amin’ity fandraisam-pitenenana ity, dia mikendry ny hanavao sy hanarina tanteraka ny endriky ny Zandarimariam-pirenena ny Général de Brigade MAMELISON Mbina Nonos, mba hanana hery matihanina, matoky tena ary itokisan’ny vahoaka.