𝐅𝐀𝐇𝐀𝐌𝐀𝐈𝐙𝐀𝐍’𝐍𝐘 « 𝐁𝐀𝐙𝐀𝐑𝐘 𝐊𝐄𝐋𝐘 » 𝐓𝐎𝐀𝐌𝐀𝐒𝐈𝐍𝐀 : 𝐕𝐀𝐑𝐘 𝟔𝟓 𝐓𝐀𝐎𝐍𝐈𝐍𝐀 𝐍𝐀𝐓𝐎𝐊𝐀𝐍’𝐍𝐘 𝐅𝐈𝐊𝐀𝐌𝐁𝐀𝐍𝐀𝐍𝐀 𝐅𝐀𝐍𝐉𝐈𝐑𝐘 𝐇𝐎 𝐀𝐍’𝐈𝐑𝐄𝐎 𝐍𝐈𝐀𝐑𝐀𝐌-𝐁𝐎𝐈𝐍𝐀

Taorian’ny hain-trano nitranga tao amin’ny tsena « Bazary Kely » ao Toamasina, ny 02 Aogositra 2026, dia nandefa iraka teny an-toerana Ramatoa Elisa RANDRIANIRINA, filoha mpanorina ny Fikambanana Fanjiry, hijery akaiky ny zava-misy sy hitondra fanohanana ho an’ireo niaram-boina.

Tafiditra ao anatin’ny asa sosialy sahanin’ny Fikambanana Fanjiry ny fanohanana ireo mpiara-belona miatrika fahasahiranana sy voina. Manoloana ny fahavoazana nateraky ny fahamaizan’ny Bazary Kely dia nidina teny an-toerana ireo solontenan’ny fikambanana, ho fanehoana firaisankina amin’ireo niharam-boina.

𝐕𝐀𝐑𝐘 𝟔𝟓 𝐓𝐀𝐎𝐍𝐈𝐍𝐀 𝐇𝐎 𝐀𝐍’𝐍𝐘 𝐓𝐒𝐄𝐍𝐀 𝟐 𝟒𝟏𝟔

Araka ny fanazavana voaray, vary 65 taonina, izany hoe 1 300 gony, no natokana ho fanampiana ary hozaraina amin’ireo tsena 2 416 voakasiky ny voina.

Natao hanamaivanana ny fahasahiranan’ireo niharam-boina ity fanampiana ity, indrindra fa maro amin’ireo tsena may no isan’ny fototry ny fiveloman’ny fianakaviana.

Ho an’ny Fikambanana Fanjiry, tafiditra ao anatin’ny asa sahaniny ny fanohanana ny mpiara-belona sy ny fanaovana voin-kava-mahatratra, indrindra rehefa misy loza na voina tampoka mianjady amin’ny mponina.

𝐌𝐀𝐈𝐍-𝐓𝐀𝐍𝐘 : 𝐌𝐈𝐋𝐀 𝐇𝐀𝐌𝐀𝐅𝐈𝐒𝐈𝐍𝐀 𝐍𝐘 𝐅𝐀𝐇𝐀𝐌𝐀𝐈𝐋𝐎𝐀𝐍𝐀 𝐀𝐌𝐈𝐍’𝐍𝐘 𝐀𝐅𝐎

Eo anatrehan’ny tranga tahaka izao, ary indrindra amin’izao ankatoky ny vanim-potoanan’ny main-tany izao, dia ilaina ny fahamailoan’ny tsirairay amin’ny fisorohana ny hain-trano.

Tokony hojerena tsara ny fitaovana elektrika sy ireo mety hiteraka « court-circuit », tsy avela hirehitra tsy misy mpanara-maso ny fatana na afo, ary mila fitandremana manokana ny fampiasana labozia, arina, entona fandrehitra ary ireo akora mora mirehitra.

Ho an’ireo tsena sy toerana be olona kosa, zava-dehibe ny fananana extincteur na fitaovana famonoana afo vonjimaika mora raisina, ary ny fitazonana hatrany ireo lalana ahafahana mivoaka haingana rehefa misy loza.

Ny afo kely tsy voafehy dia mety hivadika ho voina goavana ao anatin’ny fotoana fohy. Koa ny fisorohana, ny fitandremana ary ny fahamailoan’ny tsirairay no fiarovana voalohany amin’ny hain-trano.