Niteraka ahiahy sy fahatairana teo anivon’ny fianakaviana sy ny mponina ny tranga iray nahavoarohirohy lehilahy iray tamin’ny fakàna an-keriny zazavavy kely 9 taona. Voavonjy ara-potoana ilay zaza, raha efa eo am-pelatanan’ny Zandarimariam-pirenena kosa ilay lehilahy voasambotra.
Tranga mifandraika amin’ny fakàna an-keriny zaza tsy ampy taona indray no voalaza fa niseho tao amin’ny faritra Amoron’i Mania, ny talata teo. Araka ny fampitam-baovao voaray, zazavavy kely 9 taona, avy any Ambahimanambola, Antsirabe, no voalaza fa lasibatry ny fakàna an-keriny.
Lehilahy iray no voasambotry ny fokonolona taorian’ny nahavoatonontonona azy tamin’ity raharaha ity. Raha ny fanazavana nentin’ny fianakaviana, dia olona akaiky ny fianakaviana ihany no ahiana ho tompon’antoka tamin’ny zava-nitranga.
Misy ihany koa ny ahiahy nipoitra fa mety nokasaina hoentina any amin’ny toerana fitrandrahana vato ilay zaza. Araka ny fitantaran’ny fianakaviana, dia voalaza fa nisy finoanoam-poana na fiheverana manokana nanosika ilay voarohirohy hanao izany, saingy mbola andrasana ny vokatry ny fanadihadiana ofisialy hanamarinana ny tena antony sy ny fizotry ny raharaha.
Soa ihany fa voavonjy ara-potoana ilay zazavavy kely, talohan’ny mety hahavoa azy. Taorian’izay dia voasambotry ny fokonolona ilay lehilahy voarohirohy, ary natolotra ny Zandarimariam-pirenena ao amin’ny CB Andranomadio Antsirabe hanaovana fanadihadiana.
Nambaran’ny dadaben’ilay zaza, hita amin’ny sary, fa mbola miandry ny fanazavana feno avy amin’ny mpanao fanadihadiana ny fianakaviana. Andrasana araka izany ny tohin’ny raharaha sy ny fanapahan-kevitra horaisin’ny manampahefana mahefa.
Manoloana izao tranga izao, ilaina hatrany ny fitandremana sy ny fiaraha-miasa eo amin’ny fokonolona, ny fianakaviana ary ny mpitandro filaminana, indrindra amin’ny fiarovana ny zaza tsy ampy taona sy amin’ny fanomezana vaovao marina mety hanampy ny fanadihadiana.
Nangonin ‘Lay Mahitsy
