𝐀𝐍𝐓𝐒𝐎𝐇𝐈𝐇𝐘 : 𝐕𝐎𝐀𝐋𝐀𝐙𝐀 𝐅𝐀 𝐍𝐈𝐒𝐘 𝐎𝐋𝐎𝐍𝐀 𝐍𝐀𝐍𝐀𝐊𝐀𝐍𝐀 𝐀𝐍-𝐊𝐄𝐑𝐈𝐍𝐘 𝐍𝐘 𝐅𝐈𝐃𝐈𝐑𝐀𝐍𝐀 𝐓𝐀𝐎 𝐀𝐌𝐈𝐍’𝐍𝐘 “𝐆𝐑𝐄𝐄𝐍 𝐒𝐏𝐀𝐂𝐄”

Araka ny vaovao voaray, dia nisy tranga nampiahiahy nitranga tao amin’ny toeram-pilanonana “GREEN SPACE ANTSOHIHY” ny alakamisy 21 Mey 2026, tokony ho tamin’ny 09 ora maraina teo ho eo. Miaramila dimy lahy, notarihin’ny manamboninahitra iray mitondra galona Kapiteny, no voalaza fa niditra an-keriny sy nanakana ny fidirana sy fivoahana tao amin’ity toerana ity.

Raha ny fanazavana azo avy amin’ireo tompon’andraikitra ao an-toerana, dia nobahanan’ireo miaramila ny lalana rehetra miditra sy mivoaka ao amin’ilay toerana, nefa voalaza fa tsy nampiseho taratasy na fahazoan-dalana ara-dalàna manamarina izany hetsika izany izy ireo. Tsy izay ihany fa voalaza ihany koa fa nesorin’izy ireo ny “caméra de surveillance” izay natao hiantohana ny filaminana sy fiarovana ny toerana.

Nambaran’ireo mponina manodidina sy ireo tompon’andraikitra ao amin’ny “GREEN SPACE ANTSOHIHY” fa mitondra fitaovam-piadiana ireo olona voakasika mandritra ny alina, raha manao fanamiana sivily kosa amin’ny antoandro. Toe-javatra izay vao mainka nampitombo ny ahiahin’ireo tompon’orinasa sy ny mponina eny an-toerana.

Manoloana izany, dia efa nandray fepetra ara-pitsarana ireo voakasik’ity raharaha ity. Voalaza fa efa nalefa tany an-toerana ny Huissier hanao “constat”, ary efa nisy ihany koa fangatahana “ordonnance” napetraka teo anivon’ny Tribunal Antsohihy, saingy tsy voaray tamin’ny ora farany izany, araka ny fanazavana nomen’ny tompon’andraikitra.

Noho ireo sakantsakana sy olana sedrain’izy ireo ireo dia voalaza fa voatery namindra toerana ny “POOL PARADISE”, izay isan’ireo hetsika sy fialamboly natao tao amin’ity toerana ity.

Maneho ny ahiahiny sy ny fahasahiranany ireo tompon’orinasa voakasika, satria, hoy izy ireo, dia miteraka fatiantoka ara-bola sy fahapotehan’ny asa fivelomana ny zava-misy ankehitriny. Miantso ny tompon’andraikitra mahefa izy ireo mba hijery akaiky sy handray fanapahan-kevitra haingana manoloana ity raharaha ity.

Etsy andaniny, mbola andrasana kosa ny fanazavana ofisialy avy amin’ireo tompon’andraikitra ara-miaramila sy ny manampahefana mahefa momba ity raharaha ity, mba hahafahana mametraka mazava ny zava-nitranga sy misoroka ny fifandisoam-baovao.

: Capture tamin’ny video, nalefan’ireo nihararam-boina