Antananarivo – Tonga nametraka taratasy fangatahana teny amin’ny Conseil d’État androany ireo Mpanolotsain’ny Tanànan’Antananarivo, mangataka fanazavana na interprétation mikasika ny didy navoakan’ity andrim-panjakana ity ny 9 martsa 2026. Io didy io no mandidy ny hamerenana ny fifidianana ao amin’ny Kaominina Antananarivo Renivohitra.
Ankoatra izany dia nangataka ihany koa izy ireo ny handikana mazava ny lalàna laharana 2024-002, andininy faha-130 (Vaovao), izay milaza fa: “Na manao ahoana na manao ahoana, ny delegasionina manokana dia tsy afaka misolo ny Filankevitry ny vondrombahoakam-paritra itsinjaram-pahefana izay manohy hatrany ny anjara asany.”
Nohamafisin’ireo mpanolotsaina fa tsy mitsipaka velively ny didy navoakan’ny Fitsarana Avo momba ny Lalàmpanorenana (HCC) izy ireo, satria didy farany sy tsy azo ivalozana izany. Araka ny fanazavan’izy ireo, ny fangatahana fandikana ny didy sy ny lalàna dia natao mba hanazavana ny fomba fampiharana azy, ho tombontsoan’ny tanànan’Antananarivo sy ho fanajana ny fitsipiky ny fisaraham-pahefana eo amin’ireo andrim-panjakana.
Nangonin’i Bevomaso
