𝐅𝐚𝐧𝐨𝐡𝐞𝐫𝐚𝐧𝐚 𝐧𝐲 𝐟𝐚𝐧𝐚𝐧𝐝𝐞𝐯𝐨𝐳𝐚𝐧𝐚 𝐦𝐚𝐨𝐝𝐞𝐫𝐢𝐧𝐚: 𝐦𝐢𝐚𝐫𝐚-𝐦𝐢𝐣𝐨𝐫𝐨 𝐚𝐦𝐢𝐧’𝐧𝐲 𝐚𝐝𝐲 𝐚𝐦𝐢𝐧’𝐧𝐲 𝐟𝐚𝐧𝐨𝐧𝐝𝐫𝐚𝐧𝐚𝐧𝐚 𝐨𝐥𝐨𝐧𝐚 𝐢 𝐌𝐚𝐝𝐚𝐠𝐚𝐬𝐢𝐤𝐚𝐫𝐚

Tsy vitsy ireo olombelona, indrindra fa ireo tanora vehivavy mitady fivelomana, no lasibatry ny famitahana amin’ny endrika famarinana.

Ho fanoherana izany tranga mampalahelo izany, dia notanterahina androany, 30 Jolay, ny Andro Iraisam-pirenena ho Fanoherana ny Famarinana Olombelona, hetsika iraisana nokarakarain’ny fikambanana DIS-MOI (avy any Maorisy), PASSERELLE, ary BNLTEH (Birao Nasionaly Miady amin’ny Fanondranana Olona eto Madagasikara), ka tontosaina tao amin’ny Hotel Asia & Africa, Antananarivo.

𝐕𝐞𝐡𝐢𝐯𝐚𝐯𝐲 𝐌𝐚𝐥𝐚𝐠𝐚𝐬𝐲 — 𝐥𝐚𝐬𝐢𝐛𝐚𝐭𝐫𝐚 𝐯𝐨𝐚𝐥𝐨𝐡𝐚𝐧𝐲 𝐚𝐦𝐢𝐧’𝐧𝐲 𝐟𝐚𝐧𝐨𝐧𝐝𝐫𝐚𝐧𝐚𝐧𝐚 𝐨𝐥𝐨𝐧𝐚

Araka ny fanadihadiana nataon’ireo fikambanana mpiaro zon’olombelona, i Madagasikara dia isan’ny firenena ahitana tranga maro amin’ny fanondranana olona. Ireo tovovavy Malagasy mitady asa no matetika iharan’ny fanambakana: tolotra asa mamirapiratra, saingy miafara amin’ny fanandevozana ara-nofo, faneriterena, fanalam-baraka, ary indraindray aza miafara amin’ny fahafatesana.

𝐁𝐍𝐋𝐓𝐄𝐇: rantsam-panjakana miatrika mivantana ny olana

Manoloana izany, dia mijoro sy miasa amin-kitsim-po ny BNLTEH, rantsam-panjakana eo ambany fiahian’ny Minisiteran’ny Fitsarana. Izy no tompon’andraikitra amin’ny ady amin’ny fanondranana olona, na eto an-toerana na any ivelany.

Manao asa fampahafantarana, fanentanana ary fiaraha-miasa amin’ireo fikambanana sy solontenam-pirenena samihafa izy, ho fiarovana ireo marefo sy mora voafandrika.

𝐅𝐢𝐟𝐚𝐧𝐚𝐨𝐯𝐚𝐧-𝐭𝐬𝐨𝐧𝐢𝐚: marika iray amin’ny fiaraha-mientana

Nandritra ity andro manan-danja ity dia nisy ihany koa ny fifanaovan-tsonia ara-piaraha-miasa teo amin’ny BNLTEH sy ireo mpiara-dia avy any ivelany, indrindra ny avy amin’i Maorisy sy Frantsa, izay maneho tanana mitambatra amin’ny ady amin’ity fanondranana olona ity.

Anisan’ireo nitarika sy nanome lanja ny fotoana ny Minisitry ny Asa, ny Ambasadaoro Amerikanina eto Madagasikara, ary ireo solontenan’ny fikambanana iraisam-pirenena niara-nirotsaka amin’ny fanatanterahana ny hetsika.

𝐅𝐞𝐡𝐢𝐧𝐲

Tsy vitan’ny hoe fankalazana fotsiny ny Andro Iraisam-pirenena ho Fanoherana ny Famarinana Olombelona, fa fampahatsiahivana antsika rehetra koa fa mbola maro ireo rahavavy sy rahalahy mitaraina anaty fahanginana. Miankina amin’ny fiaraha-mientantsika amin’ny maha-olombelona, amin’ny fitandrovana sy fanajàna ny zon’ny hafa, no hisian’ny fandrosoana marina.