Toliara – Raharaham-pifidianana: Nampiakatra fitoriana eny amin’ny Fitsarana Ambony (Cassation) i Ralaivahiny Fréro
Toliara, 24 Jolay 2025 – Manoloana ny fanapahan-kevitra navoakan’ny Tribonaly Administratif izay nanamafy fa lany ara-dalàna ny ben’ny tanàna vaovao ao amin’ny kaominina Toliara I, dia nampiakatra fitoriana eny amin’ny Fitsarana Ambony na Cassation i Ralaivahiny Fréro, iray amin’ireo kandidà nandray anjara tamin’ity fifidianana ity.
Tamin’ny tafatafa nifanaovany tamin’ireo mpanao gazety teto an-toerana, dia nanazava ity kandidà ity fa mbola manana olana sy ahiahy lehibe momba ny fizotry ny fifidianana notanterahina. Notsiahiviny manokana ny resaka tsy fetezan’ny lisitry ny mpifidy, ny fanapariahana tsy ara-drariny afisy sy fitaovana fampielezan-kevitra, ary ny fomba nitantanan’ny vaomiera manokana ny voka-pifidianana.
« Tsy fanenjehana manokana olona io fitoriana io fa fitakiana amin’ny anaran’ny demokrasia. Raha tonga amin’ny fitsarana ambony aza no ilàna izany, dia aleo manohy hatrany ny lalana ara-dalàna. Ny hany tadiavina dia ny fahamarinana sy ny fitovian-jo ho an’ny rehetra eo amin’ny sehatra politika, » hoy i Ralaivahiny Fréro.
Fanapahan-kevitra voalohany, saingy tsy farany
Tsiahivina fa nisy fitoriana napetraky ny kandidà Ralaivahiny Fréro tany amin’ny Tribonaly Administratif, saingy nolavin’ny fitsarana izany ka nanamafy ny fahalemen’ny antony fitoriana. Araka ny fanazavana avy amin’ny mpahay lalàna, dia zon’ny tsirairay ny mampiakatra fitoriana eny amin’ny Fitsarana Ambony, indrindra raha hita fa nisy lesoka tamin’ny fomba nampiharana ny lalàna na fifandirana amin’ny fandikana didy aman-dalàna.
Miandry ny didy farany
Mandritra izany fotoana izany dia mbola mitana ny toerany ara-dalàna ny ben’ny tanàna voafidy, miandry ny didy havoakan’ny Fitsarana Ambony amin’ny herinandro sy volana ho avy. Raha toa ka mahomby ny fitoriana, dia mety hanan-kery ny fanafoanana ny vokatra na famerana indray ny fifidianana amin’ny distrika na birao sasantsasany.
Miandrandra am-pitoniana ny vahoaka sy ny mpanara-baovao, satria io raharaha io dia fitsapana iray lehibe ho an’ny fahatomombanan’ny demokrasia sy ny fifidianana eto an-toerana.
Nangonin ‘Lay Mahitsy
