Taorian’ny asa mangina nataony mahakasika an’izao fiatrehana ny fifidianana Ben’ny tanàna sy ny Mpanolontsaina ho avy izao dia nanao fanambarana ny fikambanana KMF/CNOE Fanabeazana olompirenena ny alatsinainy 07 Oktobra teo.
« Nisafidy niasa nangina izahay tamin’ny Faritra maro manerana ny Nosy. Tsikaritra fa diso miabo ny fahefan’ny Mpanapankevitra amin’ny sehatry ny fifidianana. Azo antoka fa tsy hanaratsy tena ireo manampahefana sy ny antokony ka ahiana ho lasa manilika ny hafa izany », hoy ny Filohan’ny KMF/CNOE, Norbert Namearison.
Mila mahaleotena tanteraka ny CENI sy ny fitsinjaram-pahefana, hoy hatrany ny fanambarany. Raha ny zava-misy ankehitriny dia tsy azo antenaina ny hisian’izany fitsinjaram-pahefana vanona izany eto amintsika noho ny fivangongon’ny fahefana. Manampy trotraka ihany koa ny adisisiky ny antoko politikan’ny mpanohitra na ny mpomba ny fitondrana mba handrombaka ireo renivohi-paritany, hoy hatrany ny voalazan’ity lehiben’ny fikambanana ity.
» Fifidianana manakaiky vahoaka indrindra ny Ben’ny tanàna sy ny Mpanolontsaina ka mila olona miaraka amin’ny vahoaka no hapetraka amin’ireo toerana ireo fa tsy ampy andrefesana raha hoe miaraka amin’ny fitondrana. Fa hatreto, hita sy tsapa fa mbola tsy tena mipetraka eto amin’ny firenentsika izany demokrasia izany », hoy Andriamatoa Namerarison Norbert , Filohan’ny Fikambanana KMF/CNOE- Fanabeazana olompirenena, raha nitafa tamin’ny mpanao gazety.
Nangonin’i Gabin Eloi
