Finoana: FIANGONANA LOTERANA MALAGASY
Tontosa omaly Alahady 07 Desambra 2025, ny famaranana ny KMSL (Komity Mpiandraikitra ny Synoda Lehibe) 151, tao amin’ny Distrika Antanifotsy, Faritra Vakinankaratra.
Raha eo amin’ny Rafitry ny Fiangonana Loterana Malagasy, dia ity no rafitra ambony mpanampam-kevitra ny Fiainan’ny FIangonana FLM, izay eo ambanin’ny fiahian’ny Synoda Lehibe (SL) izay fahefana faratampony.
Nandritra ny famaranana ny fivoriana izany, dia maro ireo Kristiana tonga tao anatin’ny Synodam-Paritany Onive, ary tonga maro ihany koa ireo solotenam-panjakana avy amin’ny foibe, toy ny Rtoa RAZAFIMANANTSOA Lobo Hanitriniaina, Minisi-panjakana eo anivon’ny Fiadidian’ny Repoblika misahana ny Fanavaozana, Atoa RAKOTONANDRASANA Hanitra Velonjara Tiaray Minisitry ny Atitany sy ny Fitsinjarampahefana, Rtoa ANDRIAMADISON Haingotiana Michela Angèle, Minisitry ny Varotra sy ny Fanjifana
Atoa Fetra Ralambozafimbololona, Filoha Lefitry ny Antenimierampirenena, Ny Tale Jeneralin’ny Polisimpirenena Commissaire Divisionnaire de Police TSARAMONINA Ravony Jean Victor ary Ireo olomanankaja Sivily sy Miaramila sy ireo rafim-panjakana teny an-toerana.
Nisy ny fandraisam-pitenenana ka nisolon-tena ny mpandray vahiny ny Solombavambahoakan’ny Madagasikara izay voafidy tao amin’ny Distrika an’Antanifotsy, Atoa Narison RAFIDIMANANA, ary tamin’izany no nanehoany ny fifaliany tamin’ny nahatongavan’ireo Olom-piangonana manerana ny nosy tonga namangy an’Antanifotsy.
Ny avy amin’ny Foibe fanjakana kosa dia Rtoa RAZAFIMANANTSOA Lobo Hanitriniaina, Minisi-panjakana eo anivon’ny Fiadidian’ny Repoblika misahana ny Fanavaozana, izay naneho hatrany fahavononana hiara-hiasa amin’ny fiangonana Loterana Malagasy, ary nanambara ny fiaraha-miasa amin’ny fikaonandoham-pirenena.
Namarana ny fandraisam-pitenenana moa ny Filohan’ny Fiangonana Loterana Malagasy, ary nilaza ny tenany fa eo hatrany Fiangonana amin’izay fiaraha-miasa tandrify ka mahasoa ny vahoaka Malagasy sy ny Kristiana.
Nangonin’i Yves RAZAFIHARISON
