𝗡𝗶𝗵𝗮𝗼𝗻𝗮 𝗧𝗮𝗺𝗶𝗻’𝗻𝘆 𝗙𝗶𝗹𝗼𝗵𝗮 𝗔𝗻𝗱𝗿𝘆 𝗥𝗮𝗷𝗼𝗲𝗹𝗶𝗻𝗮 𝗻𝘆 𝗙𝗙𝗞𝗠

Nandray ireo Filoham-piangonana mpikambana ao amin’ny Fikambanan’ny Fiangonana Kristianina eto Madagasikara (FFKM) ny Filohan’ny Repoblika, Andry Rajoelina, omaly. Araka ny fanazavan’ny Filoha, dia nangataka fihaonana manokana tamin’ny Fitondram-panjakana ireo mpitarika ara-panahy, noho ny fahasahiranana sy ny fisaintsainana lalina entin’ny toe-draharaha iainan’ny firenena amin’izao fotoana izao.

Nampitain’ny FFKM tamin’ny Filoham-pirenena ny ahiahy sy ny faniriany hikarakarana marimaritra iraisana, manoloana ny krizy ara-tsosialy sy ara-politika mihanaka. Nasehon’izy ireo fa tsy afaka ny hangina eo anatrehan’ny olana mianjady amin’ny vahoaka ny Fiangonana, satria antsoin’ny andraikitra maha-ray aman-dreny ara-panahy azy ireo.

Nandritra ny resadresaka, nilaza ny Filohan’ny Repoblika fa vonona hihaino sy handray soso-kevitra avy amin’ireo solontenan’ny FFKM ny Fitondram-panjakana. Nambarany ihany koa fa ilaina ny fifampidinihana sy ny fifampiresahana amin’ny rehetra, indrindra ireo hery mpanara-maso ara-panahy, mba hahitana vahaolana maharitra sy hahafahana mitondra fitoniana indray ho an’ny firenena.

Araka ny loharanom-baovao, mbola hisy fihaonana hafa amin’ny manaraka hanohizana ity fifampidinihana ity, mba hamaritana mazava kokoa ny paikady sy ny fandraisana andraikitra.

Nangonin’ Lay Mahitsy