Vehivavy teratany Koreana voarohirohy amin’ny famonoana olona efa nomanina sy fanapoizinana
TOLIARA, — Miteraka resabe ao an-drenivohitr’i Atsimo Andrefana amin’izao fotoana izao ny raharaha mahakasika an’i Kim SOONYI, vehivavy teratany Koreana sady mpandraharaha eo anivon’ny orinasa BLUE OCEAN, izay voatonona amin’ny raharaha heloka bevava maro, ahitana famonoana olona efa nomanina (meurtre avec préméditation), fikasana hamono olona, ary fanapoizinana (empoisonnement toxique).
Araka ny loharanom-baovao akaiky ny fanadihadiana, dia efa eo am-pelatanan’ny Zandarimariam-pirenena sy ny Fitsarana ao Toliara ny raharaha amin’izao fotoana izao. Ny fahafatesan’i KANG Deug Hee, vadin’ity vehivavy ity sady iray amin’ireo mpikambana ambony ao amin’ny orinasa BLUE OCEAN, no fototry ny fanadihadiana.
Fisamborana nahitana savorovoro
Raha ny vaovao voaray, dia nisy ny fikasana hisamborana an’i Kim SOONYI teny amin’ny toeram-ponenany. Voalaza anefa fa nanidy ny vavahady izy tamin’ny fahatongavan’ireo mpanao famotorana. Fotoana fohy taorian’izay dia nivoaka ihany ilay ramatoa ary nankany amin’ny Tobin’ny Zandarimaria.
Nandritra ny famotorana natao taminy dia nilaza izy fa tsy mahafehy teny Frantsay sy Anglisy. Misy anefa ireo mpiara-miasa taminy no milaza fa fomba entiny hisorohana ny fanadihadiana izany, indrindra fa efa an-taonany maro izy no niasa teo amin’ny sehatry ny fandraharahana eto Madagasikara.
Voalaza ihany koa fa nitondra vola tao anaty gony roa ilay vehivavy talohan’ny nandehanany nankany Antananarivo, taorian’ny fisokafan’ny fanadihadiana.
Ahiahy momba fanodinkodinana antontan-taratasy
Nisongadina nandritra ny raharaha ihany koa ny resaka mikasika ny fitantanana ny orinasa BLUE OCEAN.
Niorina tamin’ny taona 2019 ity orinasa miasa amin’ny sehatry ny fanangonam-bokatra an-dranomasina ity, ary voalaza fa ara-dalàna tanteraka ny fisoratana sy ny antontan-taratasiny.
Na izany aza, tamin’ny volana Desambra 2024, dia nivoaka teo anivon’ny EDBM ny antontan-taratasy “Statuts mise à jour”, izay voalaza fa nankatoavin’ny fivoriambe (Assemblée Générale). Nolavin’i KANG KYU Boem, filoha mpanorina ny orinasa anefa izany fanovana izany, ka vao mainka nampitombo ny ahiahy momba ny mety ho fanodinkodinana sy tetika haka fahefana eo anivon’ny orinasa.
Fahafatesana mampiahiahy
Ny 30 Desambra 2024 no voalaza fa nodimandry i KANG Deug Hee. Raha ny fanazavana voaray, dia tsy nisy fifampidinihana tamin’ny fianakaviany ny momba ny fikarakarana ny razana, fa nentina nodorana avy hatrany ny vatana mangatsiaka.
Taorian’ny fizahana sy ny fanadihadiana natao, dia voalaza fa nahitàna singa maro mampiahiahy ny manodidina ny fahafatesany. Misy amin’ireo antontan-taratasy voaray eo anivon’ny Kaominina Toliara sy ny mpisolovava no heverina fa mety hanamafy ny ahiahy momba ny mety ho fisian’ny famonoana voaomana mialoha.
Ahiahy fanapoizinana hafa
Ankoatra izay, dia ahiana ihany koa ny mety ho fanapoizinana an’i KANG KYU Boem, izay mbola manaraka fitsaboana any Antananarivo amin’izao fotoana izao. Tsy mbola namoaka fanambarana ofisialy momba izany anefa ny tompon’andraikitra misahana ny fanadihadiana.
Raharaha mbola eo am-panaovana fanadihadiana
Hatramin’izao dia mbola eo am-pelatanan’ny mpanao famotorana ny raharaha, ary andrasana ny mety ho fanapahan-kevitry ny Fitsarana manoloana ireo fiampangana samihafa mahazo an’i Kim SOONYI.
Mbola miandry ny tohin’ny fanadihadiana sy ny fivoaran’ny raharaha ireo mpanara-baovao sy ny mponina ao Toliara.
