Marihina mandritra ny roa andro eny amin’ny zaridainan’Antaninarenina, nanomboka ny 20 marsa ary hitohy ny 21 marsa, ny hetsika fampirantiana ho fankalazana ny Andron’ny Vehivavy Tantsaha Mpamokatra. Hetsika misokatra ho an’ny besinimaro izy ity, natao hanasongadinana ny anjara toerana raisin’ny vehivavy eo amin’ny sehatry ny famokarana sy ny fampiroboroboana ny teknika fambolena agroekolojika.
Mifototra amin’ny fampiasana akora voajanahary sy teknika manaja ny tontolo iainana ny fomba fambolena agroekolojika. Tsy miankina amin’ny fampiasana akora simika izy io, indrindra amin’ny fanatsarana sy fanamasahana ny tany, ka heverina ho iray amin’ireo lalana mankany amin’ny fambolena maharitra sy mahasalama.
Maherin’ny tranoheva 12 no mandray anjara amin’ity hetsika ity, mampiranty ireo vokatra azo avy amin’ny teknika agroekolojika. Ankoatra ny fampahafantarana ny fomba famokarana, dia sehatra ahafahan’ny mpamokatra mihaona mivantana amin’ny mpanjifa ihany koa ny hetsika, ka ahafahana manandratra ny vokatra avy eny ambanivohitra.
Nandritra ny lanonam-panokafana dia nanamafy ny Tale Jeneraly misahana ny Digitalisation, Gouvernance et Données eo anivon’ny Minisiteran’ny Fambolena sy Fiompiana, Tojosonarimanana Navalona, fa zava-dehibe ny fanamafisana ny fampiasana ny teknika agroekolojika mba hanatsarana ny kalitaon’ny vokatra sy hiarovana ny fahasalaman’ny mpanjifa. Nambarany fa mety hiteraka voka-dratsy amin’ny fahasalamana sy ny fanjariantsakafo ny fampiasana tafahoatra ny akora simika eo amin’ny fambolena sy fiompiana.
Nampiavaka ny lanonana ihany koa ny fanolorana fanamiana ho an’ireo vehivavy mpamokatra miompana amin’ny fiompiana omby fakana ronono, ho fanohanana azy ireo amin’ny asa fikarakarana ny sakafon’omby sy ny fanatsarana ny famokarana.
Fikambanana sy rafitra maro no nandray anjara tamin’ny hetsika. Anisan’izany ny Fikambanana FARM Madagasikara, izay nanome fanazavana momba ny ezaka sy ny ady sisika ataon’ny vehivavy tantsaha amin’ny fampiroboroboana ny fampiasana zezika ekolojika. Nandray anjara ihany koa ny GSDM, izay nanazava bebe kokoa ny tombontsoa azon’ireo vondrona tantsaha mpikambana ao aminy amin’ny alalan’ireo fiofanana sy fanohanana maro samihafa omen’izy ireo.
Tafiditra tao anatin’ny hetsika ihany koa ny Ofisim-pirenena momba ny Fanjariantsakafo (ONN) sy ny Fikambanana AFAFI, izay nitondra fanazavana momba ny sakafo ara-pahasalamana ho an’ny vehivavy bevohoka sy ny zazakely. Eo amin’ny sehatry ny fambolena sy zaridaina ara-boajanahary kosa dia nandray anjara ny Faith Garden, mpanamboatra zaridaina mampiasa voly ahitra biolojika izay sady ampiasaina ho fanafody natoraly.
Tonga nanotrona ny lanonana ireo mpiara-miombon’antoka amin’ny ministera sy ireo tompon’andraikitra avy amin’ny sehatra samihafa, anisan’izany ny solontenan’ny Fiadidian’ny Tanànan’Antananarivo Renivohitra.
Amin’ny ankapobeny dia manome sehatra ho an’ny vehivavy tantsaha hanehoana ny traikefany sy ny vokatra vokariny ity hetsika ity, sady mamporisika ny fampiroboroboana ny fambolena manaja ny tontolo iainana sy miaro ny fahasalaman’ny mpanjifa.
Nangonin ‘Lay Mahitsy
