Tsy ho afaka ampiasaina ny tobim-pahasalamana ao Ankiabe Salohy distrikan’i Mandritsara. Simba vokatry ny tafio-drivotra mahery nandalo ny alin’ny alatsinainy 15 janoary 2024 ny fotodrafitrasa. Tsy afaka andraisana marary intsony ny trano satria efa marefo noho ny fahanterany ary ahiana hihotsaka. Hisy fiatraikany amin’ny mponina ao anatin’ny kaominina Ankiabe Salohy ny fahasambana misy izao; ny vehivavy bevohoka sy ireo mitaiza manana marary no hitondra faisana voalohany voalohany amin’ny fahavoazana misy izao. Tsy hisy birao hiasana moa ny infirimiera 3 sy Mpampivelona miasa amin’ny CSB2 ity. Efa nanao tatitra tamin’ny tompon’andraikitra tandrify azy ny mponina any an-toerana manoloana ny zava-misy. Manao antso ireto farany ny hanampiana azy ireo haingana.
Nangonin’i Claudio
