𝐅𝐈𝐀𝐑𝐎𝐕𝐀𝐍𝐀 𝐈𝐑𝐄𝐎 𝐕𝐀𝐑𝐈𝐑𝐀: 𝐇𝐀𝐓𝐒𝐀𝐍𝐆𝐀𝐍𝐀 𝐓𝐎𝐄𝐑𝐀𝐍𝐀 𝐇𝐀𝐍𝐃𝐑𝐀𝐈𝐒𝐀𝐍𝐀 𝐀𝐙𝐘 𝐈𝐑𝐄𝐎 𝐀𝐍𝐊𝐈𝐙𝐘 𝐇𝐎𝐘 𝐍𝐘 𝐅𝐈𝐋𝐎𝐇𝐀𝐍’𝐍𝐘 𝐅𝐀𝐍𝐀𝐕𝐀𝐎𝐙𝐀𝐍𝐀

Mihamafy hatrany ny ahiahy sy ny tebitebin’ny mponina manoloana ny fitomboan’ireo tranga fanapahan-doha mahakasika ireo ankizy varira any amin’ny faritra maro eto Madagasikara. Ho setrin’izany toe-javatra mampanahy izany dia nanambara fepetra vaovao ny Filohan’ny Fanavaozana, izay mikendry ny hanamafisana ny fiarovana sy ny fikarakarana ireo ankizy lasibatra.

Araka ny fanazavana navoakany, dia hisy toerana manokana hatsangana handraisana ireo ankizy varira mba hiantohana ny fiarovana sy ny fahasalamany. Efa voafaritra sahady ny tany hanatanterahana izany tetikasa izany, ary tsy ho ela ny hanombohan’ny asa fananganana.

Tsy ho toeram-ponenana tsotra ihany anefa no hatsangana. Nambaran’ny Filohan’ny Fanavaozana fa hisy sekoly, chapelle ary fotodrafitrasa ilaina amin’ny fiainana andavanandro ao anatin’io toerana io. Hatao laharam-pahamehana ihany koa ny filaminana, ka hisy miaramila, zandary na polisy hiandraikitra ny fiambenana sy ny fiarovana ireo ankizy sy fianakaviana hipetraka ao.

Tanjona amin’izany ny hamoronana tontolo azo antoka sy milamina, ahafahan’ireo ankizy varira miaina sy mianatra tsy misy tahotra.

Tranga nahoraka tany Toliara: olona valo nosamborina

Etsy ankilany, niteraka resabe ny raharaha fanapahan-doha ankizy varira nitranga tany Toliara. Raha ny tatitra voaray dia olona valo no voasambotra sy atao famotorana amin’izao fotoana izao, ary karandoha roa no voalaza fa tratra nandritra ny fanadihadiana.

Mahavariana fa ahitana olona avy amin’ny sokajin’asa sy sehatra samihafa ireo voarohirohy, anisan’izany ny ombiasy roa, mpianatra eny amin’ny oniversite, mpiasam-panjakana ary olon-tsotra.

Mitaky mangarahara amin’ny fanadihadiana

Manoloana ny fahamaroan’ny resaka sy ny tombantombana miparitaka, dia nanao antso avo amin’ireo tompon’andraikitra misahana ny fanadihadiana ny Filohan’ny Fanavaozana mba hampahafantatra amin’ny fomba mangarahara ny valin’ny fanadihadiana.

Nohamafisiny fa manan-jo hahafantatra ny marina ny vahoaka Malagasy, indrindra raha misy olona manana andraikitra ambony na manam-pahefana voarohirohy amin’ity raharaha ity.

Nandritra izany dia nanome toromarika mazava ho an’ireo tompon’andraikitra rehetra, indrindra ny mpitandro filaminana, ny Filohan’ny Fanavaozana mba handray andraikitra feno sy hentitra amin’ny ady amin’ireo tambajotra sy olona voarohirohy amin’ny herisetra atao amin’ireo ankizy varira.

Mampitombo ny ahiahin’ny mponina mantsy ny fitrangan’ireo raharaha fanapahan-doha misesisesy tato anatin’ny fotoana vitsy, ka mitaky fandraisana andraikitra haingana sy mahomby avy amin’ny fanjakana sy ny rafitra mpampihatra lalàna.

Raha mbola mitohy ny fanadihadiana momba ireo raharaha mampihorohoro ny sain’ny maro, dia manome fanantenana ny fikasana hanangana toerana manokana hiarovana ireo ankizy varira. Mbola andrasan’ny vahoaka kosa ny fahafantarana ny marina rehetra sy ny fanasaziana ireo tompon’antoka, mba hahafahan’ny filaminana sy ny fahatokisan’ny olom-pirenena miverina indray.