Hatomboka amin’ny fomba ofisialy ny talata 14 Aprily 2026 ho avy izao, eny amin’ny CCI Ivato, ny fikaonan-doham-pirenena momba ny tanora, hetsika lehibe iray mikendry ny hanamafisana ny anjara toeran’ny tanora eo amin’ny fampandrosoana ny firenena.
Araka ny fanazavana voaray, tsy ny Ministeran’ny Tanora sy ny Fanatanjahantena irery no mikarakara ity fotoana ity, fa iarahan’ny ministera maro sy ny eo anivon’ny Fiadidiana ny fanavaozana ny Repoblika miara-misalahy. Maneho izany ny finiavana hampiditra fomba fijery iombonana sy politika mirindra manoloana ny olan’ny tanora.
Nasongadin’ny Minisitry ny Tanora sy ny Fanatanjahantena fa napetraka ho laharam-pahamehana ny fanatanterahana ity fikaonan-doha ity. Nambarany ihany koa fa misokatra ho an’ny tanora rehetra manerana ny Nosy ny fandraisana anjara, tsy misy fanavahana, mba hahafahana mandray an-tsoratra sy mandinika ny hetahetan’izy ireo ary mamolavola vahaolana maharitra.
Hifantoka amin’ny fifanakalozan-kevitra sy fanangonana soso-kevitra avy amin’ny tanora ny hetsika, izay antenaina hitondra vokatra azo tsapain-tanana ho an’ny politika nasionaly mikasika ny tanora eto Madagasikara.
