Natao androany zoma teo anoloan’ny Lapan’ny Tanànan’ny CR Manerinerina ny fizarana fanampiana avy amin’ny Fitondram-panjakana, natolotry ny BNGRC ho an’ireo mponina tra-boina noho ny haintrano nitranga herinandro vitsy lasa. Tongan-davana avy any Antananarivo ny delegasiona notarihin’i Lt Teddy sy ireo mpiara-miasa aminy telo lahy, nitondra ireo entana tamin’ny fiaraben’ny BNGRC.
Nahazo izany fanampiana izany ny Fokontany Andranolava sy Bevazaha, ka tokantrano 183 no voakasika. Ireto avy ny karazany sy ny habetsaky ny fanampiana tonga:
-
Vary : 2 288 kg
-
Menaka : 183 litatra
-
Voamaina : 458 kg
-
Koveta : 183
-
Zinga : 183
-
Lovia plastika : 915 isa
-
Savony : 360 isa
Ny Lehiben’ny Distrika no nanolotra ireo entana ireo tamin’ny anaran’ny Fitondram-panjakana sy ny BNGRC. Nisaotra manokana ny Fanjakana sy ny BNGRC kosa ny Solombavambahoaka, noho ny fijerena sy fitsinjovana ireo traboina tsy mbola tafarina tanteraka.
Nanotrona sy nanome lanja ny hetsika ny tompon’andraikitra isan-tsokajiny avy ao amin’ny CR Manerinerina, ary tonga nanatrika ihany koa ny CT-n’ny Minisitry ny Fitsarana, Atoa Clément Jaona.
Nidera ny fahamaizana sy ny fandrindrana nataon’ny Fanjakana tamin’ny alalan’ny BNGRC avokoa ireo nandray fitenenana. Natao ihany koa ny fanentanana hoenti-mampatsiahy ny vahoaka ny amin’ny fitandremana manoloana ny afo, indrindra amin’izao vanim-potoanan’ny rivotra mahery izao.
— FDM Ambato-Boeny
📸✍️ Zandrikely Konka
