Faritra Betsiboka: Tsy mandry alina sy atondro

Tsy natao hanafana seza sy birao na ihany koa manome baiko fotsiny ny kaomandy ny vondron-tobim-pileovan’ny Zandary eto Betsiboka fa midina ifotony mametraka paikady hisorohana mialoha ny trangana tsy fandriam-pahalemana miseho, any ambanivohitra sy an-drenivohitra, ato anatin’ny faritra Betsiboka.

Nanao totoafo ny fidinana eny an-kianja sy ny dinika nifanaovana tamin’ireo olom-boafidy, olom-boatendry, ary ny fokon’olona, izay nataon’ny Lietinà-kolonely Andrianatrehina Ando Dinah, kaomandy ny vondron-tobim-pileovan’ny Zandary eto Betsiboka mba hamahana ny olana sy fisoroahana mialaho mety hisian’ny trangana Kidnapping, halatr’omby, fanakanana fiara taksiborosy, fanafihana mitam-piadiana. Nisy hatrany ny fanomezana torimarika hoan’ireo Zandary miantsehatra, eny amin’ny lalam-pirenena fahefatra sy miasa any amin’ireo zana-tobim-paritra rehetra.

Anisan’ny mampiavaka ny fidinana ifotony nataon’ity tompon’andraikitra ny filaminana, eo anivon’ny Zandarimariam-pirenena aty Betsiboka ity ny ambetin-dresaka manao hoe: tsy maintsy hampiarina amin’ireo olon-dratsy ny lalàna misy eto amin’ny tany sy ny firenena no fongorana hatramin’ny fakany tsy misy hatak’andro, ireo tsy maty manonta amin’izany, toy ny: mpiray tsikombakomba sy ny dahalo ambony latabara.

Vao tsy ela moa ny kaomandy ny vondron-tobim-pileovan’ny Zandary eto Betsiboka no nijery ny vahaolana makasika ny trangana kidnapping any amin’ny tapan’ny atsimon’ny disitrikan’i Tsaratanàna iny no midina eny amin’ny lalam-pirenena fahefatra ihany koa. Tsy nisy izay tsy resy lahatra ny olona tsirairay avy, nahitan’ny fandraisana andraikitra mateho-tia sy ho mendri-kaja, nataon’Atoa Lietinà-kolonely Andrianatrehina Ando Dinah nandritra ny fitetezam-pokontany sy kaominina, ary disitrika.

Tsy mijanona hatreo anefa ny hezaka hatao, hoy ity farany no sady nampahery sy nampitraka ny adidy iantsoroan’ireo Zandary eny an-kianja.