Zazavavikely miisa 7, eo anelanelan’ny 3 taona hatramin’ny 14 taona no nifandimby niharan’ny fanolanana nataona raim-pianakaviana iray teny amin’ny fokontany Antanimalandy Avaratra 2, fanolanana sy fifoterana nataony nandritra ny taona maro tamin’ny toerana sy fomba samihafa.
Zanany naterany, zaobaviny, zana-drahavavin’ny vadiny, fianakaviany izany hoe olona akaiky ilay nahavanon-doza avokoa ary manana rohim-pihavanana aminy ireo lasibatra.
Isaky ny manana fotoana hahafahana manararaotra ireo zaza ireo ilay rangahy tsy mataho-tody dia manampatra ny filany ary mandrahona izay tratrany mba tsy hilazalaza.
Amin’ny maha zaza azy ireo anefa dia mitantara amin’ny namany sy mifampitatara amin’izy samy izy izy fito mirahavavy ka teo no nampipoaka ny raharaha.
Tsy nisy nanampo ny zava-nisy, nentin’ny fifampitokisana ny fianakaviana ka valan-ketraka manoloana izao tranga izao taorian’ny nahafantatana ny tena zava-nisy.
Nandray andraikitra avy hatrany anefa izy ireo ka nitory ilay nahavanon-doza ary omaly tolakandron’ny zoma 11 oktobra no niakatra fampanoavana teo anoloan’ny fitsarana ambaratonga voalohany ny raharaha.
Naiditra vonjimaika am-ponja eny amin’ny fonjan’i Marofoto ity rangahy ity.
Nangonin’i Ampisafin’i Boeny
