Isany fianakaviana mbola maneho ny fifanajana sy fifankatiavana eo amin`ny fiarahamonina misy azy ny fianakaviana tsy Homana amalona ao Ambalafary kaominina Kalandy distrikan`i Mandritsara. Mipetraka ho filamatra amin`ny lafiny maro izy ireo eo anivon`ny firahamonina. Miainga avy amin`ny fanajana ny razam-be taloha sy ny kolontsaina ary ny harena navelany. Mampiavaka ny foko Tsimihety manontoo rahateo ny fanomezana haja ny ray amandreny efa lasanko razana ka aseho amin`ny fomba miavaka izay feno voninahitra.
Omaly alatsinainy 16 septambra 2024, lanonambe no natao tao Ambalafary fanadiovana sy fanarenana ny Fisoronana « Andohomby » teo koa ny famangiana ny fasan-drazana misy ny oloben`ny Tsy homana amalona. Miantso ny tokony hanamafisana fifankatiavana sy fifanajana ny Ray amandreny ao anatin`ny fianakaviambe ity. Ny fahadiovana sy fanomezana hasina ny lova napetraky ny Ray amandreny, isan`izany ny rano lehibe « Matsabôry Lanilaizana » izay niandohan`ny tananan`Ambalafary sady fiveloman`ny RAD fahiny ka lasa tsy voahaja intsony ankehitriny. Naverina ny hasin`izany amin`izao izay niantsoana mpanjaka avy ao Ampomby. Nitaona ny fianakaviana tsirairay samy hitandro toy ny anaka andriamaso ireo harena sy lova ara-drazana ireo ny Sojabe ao anatin`ny fianakaviana, nahitana ny Ray amandreny an-tanana sy monina an-tany lavitra.
Vahoaka an-drivony no tonga nanome voninahitra izany omaly, samy niombom-po naneho ny fanajany ny fomba. Ankoatra ny fikarakaran`ny ao an-tanana dia tsy niraviravy tanana koa ny RAD zanaky ny Tsy homana amalona any lavitra fa mba tonga nitarika ny hetsika ary nandray anjara betsaka tamin`ny fikarakarana ny Profesora Zafilaza, nifarimbonan`ny vahoaka maro sy ireo nasaina.
Nangonin`i Claudio
